Ish-deputetja Lajla Përnaska kritikon modelin e PD-së: Noka dhe Vokshi nuk më kanë përfaqësuar kurrë

Ish-deputetja e Partisë Demokratike, Lajla Përnaska, ka shprehur kritika ndaj mënyrës së organizimit dhe drejtimit të PD-së, duke vënë në pikëpyetje modelin politik që, sipas saj, nuk ka arritur të zgjerojë mbështetjen elektorale të partisë.

E ftuar në emisionin “Off the Record” nga Andrea Danglli në A2CNN, Përnaska u ndal te retorika e vazhdueshme e “rigjenerimit” dhe “ripërtëritjes” brenda PD-së, duke argumentuar se problemi kryesor mbetet mungesa e zgjerimit të elektoratit.

“Dëgjuam rigjenerim, ripërtëritje, riaktivizim, kemi dëgjuar rilindje, rithemelim, gjithmonë është “ri”, “ri”, “ri”. Unë e shoh të pavend këtë mënyrë të të bërit politik. PD zgjeroi shumë strukturuar por nuk zgjeroi elektoratin, u tkurr në elektorat, ky është një lloj ngërçi që lidershipi duhet ta shikojë me shumë kujdes”, tha ajo.

Përnaska shprehu gjithashtu kundërshtimet e saj ndaj figurave të Flamur Nokës dhe Albana Vokshit, duke deklaruar se nuk është ndjerë asnjëherë e përfaqësuar prej tyre.

“Sa i përket emrave sigurisht që kam edhe unë ato objeksionet e mia, s’më ka përfaqësuar kurrë z.Noka, në asnjë detaj të modelit të tij si politikan dhe si drejtues, përkundrazi, edhe në kohën kur kam bashkëpunuar kam pasur debate të forta me të, sikurse nuk me ka përfaqësuar kurrë znj.Vokshi”, u shpreh ish-deputetja.

Duke iu referuar drejtimit të Lidhjes Demokratike të Gruas, Përnaska tha se problemi nuk lidhet me emrat, por me modelin e funksionimit, për të cilin pretendon se nuk është legjitimuar përmes votës.

“S’ka rëndësi emri, por modeli, që asnjëherë s’është zgjedhur me votë dhe qëndron në mënyrë të sforcuar në një pozicion që s’i takon”, deklaroi Përnaska.