Ish-zyrtari amerikan Steinbaum: Specialja s’duhej të ngrihej, UÇK-ja u dënua më rëndë se ata që kryen krime

Jason Steinbaum, ish-zyrtar amerikan dhe ish-këshilltar i Komisionit për Punë të Jashtme në Dhomën e Përfaqësuesve të SHBA-së, ka deklaruar për Euronews Albania se Kosova nuk do të duhej ta kishte themeluar Gjykatën Speciale. Sipas tij, kjo gjykatë nuk do të duhej të ishte ngritur kurrë dhe çështjet që ajo trajtoi mund të ishin zgjidhur nga sistemi gjyqësor i Kosovës.

Duke komentuar dënimin prej 81 vjetësh burgim të shpallur ndaj katër ish-krerëve të UÇK-së — Hashim Thaçit, Kadri Veselit, Rexhep Selimit dhe Jakup Krasniqit — Steinbaum tha se Specialja nuk i ka shqyrtuar si duhet provat. Sipas tij, që nga themelimi ishte kuptuar se gjykata nuk po shkonte drejt atyre që kanë kryer krime, por kishte si cak liderët e UÇK-së.

“Mund ta kishim bërë. Kjo gjykatë nuk duhej ngritur. Mund të ishte bërë, mund të ishte trajtuar nga sistemi gjyqësor i Kosovës, dhe ne duhet t’i tregonim Kosovës se kishim besim tek sistemi i saj i drejtësisë”, tha Steinbaum.

Ai shtoi se gjykata mund të kishte përndjekur edhe serbët që kryen pjesën dërmuese të krimeve gjatë luftës në Kosovë. Duke mos e bërë këtë, sipas tij, krijohet përfundimi se qëllimi ishte dënimi i ish-krerëve të UÇK-së, jo i atyre që kryen krimet.

Steinbaum shprehu shpresën se shkalla e Apelit do të provojë se aktgjykimi dënues ishte i gabuar dhe se gjyqtarët e apelit do ta kthejnë dënimin.

Burimi: Klan Kosova