Ishin nisur për vrasje? Kapen në Sarandë me pistoleta dhe silenciatorë, arrestohen dy persona

Një ngjarje kriminale është parandaluar në Sarandë.

Policia ka arrestuar në flagrancë dy persona, të cilët dyshohet se po përgatiteshin për të kryer një vrasje.

Ata u kapën në fshatin Gjashtë, pranë një lokali, teksa kishin nxjerrë armët nga automjeti dhe qëndronin në pritë në një zonë pa ndriçim.

Në pranga ranë shtetasit S. M., 32 vjeç dhe A. K., 26 vjeç.

Gjatë operacionit u arrestuan edhe tre persona të tjerë, të dyshuar për veprën penale “Moskallëzimi i krimit”. Bëhet fjalë për V. H., 20 vjeç, V. P., 31 vjeç dhe F. B., 21 vjeç.

Gjatë kontrollit, Policia sekuestroi dy armë zjarri pistoleta, municion luftarak, një silenciator dhe dy automjete.

Operacioni u zhvillua nga shërbimet e Komisariatit të Policisë Sarandë, në bashkëpunim me Forcën Kombëtare të Sigurisë, Njësia Fier, pas informacioneve të siguruara në rrugë operative.

Sipas hetimeve paraprake, dyshohet se personat e arrestuar kishin udhëtuar drejt Sarandës me qëllim kryerjen e një vepre të rëndë kriminale.

Hetimet vijojnë nën drejtimin e Prokurorisë së Sarandës për zbardhjen e plotë të ngjarjes, identifikimin e objektivit të mundshëm dhe dokumentimin ligjor të veprimtarisë së dyshuar kriminale.