“Ishin pa licencë”, pranga edhe për 2 rojet private të sigurisë që tërhoqën zvarrë protestuesin në Zvërnec

Policia ka arrestuar dy punonjësit e kompanisë private të sigurisë, të cilët të shtunën u filmuan duke tërhequr me forcë një qytetar që protestonte kundër projektit në Zvërnec. Ndërkohë pak ditë më parë, ishte arrestuar edhe punonjësi që shfaqej duke e goditur me grusht.

“Në vijim të veprimeve hetimore dhe procedurale, për zbardhjen dhe dokumentimin e të gjitha rrethanave dhe të gjitha përgjegjësive për këtë ngjarje, shërbimet e Drejtorisë Vendore të Policisë Vlorë, në bashkëpunim me shërbimet e Drejtorisë Vendore të Policisë Tiranë, kapën dhe ndaluan shtetasit A. G., 35 vjeç dhe G. V., 41 vjeç, banues në Tiranë, pasi Gjykata e Vlorës iu ka caktuar masën e sigurisë ‘Arrest në burg’, për veprën penale ‘Heqja e paligjshme e lirisë’.

Të dy akuzohen se në bashkëpunim me shtetasin G. B. (të arrestuar), kanë tërhequr me forcë, drejt vendit të rezervuar për rojet, pjesëmarrësin në tubim, shtetasin E. S., të cilit i kanë shkaktuar dëmtime trupore.”, kanë bërë me dije uniformat blu.

Më tej, thuhet se nga verifikimet rezultoi se shtetasit e ndaluar, A. G. dhe G. V., nuk figurojnë të regjistruar apo të licencuar nga asnjë subjekt për shërbim privat të sigurisë fizike.