ITALI – Meloni përballet me votimin vendimtar për reformën zgjedhore

ROMË, 30 shtator /ATSH-DPA/- Parlamenti italian nisi sot diskutimet përfundimtare për reformën e ligjit zgjedhor të propozuar nga kryeministrja Giorgia Meloni, një ndryshim që mund t’i japë koalicionit të saj të djathtë mundësi për të siguruar një tjetër shumicë parlamentare.

Sipas projektligjit, koalicioni që fiton zgjedhjet parlamentare do të përfitojë një bonus mandatesh, me synimin e deklaruar për krijimin e qeverive më të qëndrueshme në Itali.

Votimi vendimtar pritet të zhvillohet në Dhomën e Deputetëve brenda ditëve të ardhshme.

Senati, dhoma e lartë e Parlamentit italian, e ka miratuar tashmë propozimin në mesin e shtatorit.

Meloni ka njoftuar se do ta lidhë votimin me një mocion besimi ndaj qeverisë së saj.

Nëse qeveria nuk siguron mbështetjen e nevojshme, vendi mund të shkojë në zgjedhje të parakohshme.

Zgjedhjet e radhës parlamentare janë parashikuar për vitin e ardhshëm, por ende nuk është përcaktuar një datë e saktë.

Historia e Italisë pas Luftës së Dytë Botërore është shoqëruar me paqëndrueshmëri të madhe politike, me rreth 70 qeveri që kanë marrë detyrën në Romë.

Megjithatë, koalicioni tripartiak i Melonit, i cili ka qenë në pushtet për gati katër vjet, tashmë ka vendosur rekordin për qeverinë më jetëgjatë në historinë e pasluftës së vendit.

Ligji zgjedhor italian është ndryshuar disa herë gjatë dekadave të fundit, ndryshe nga praktika në shumë demokraci të tjera evropiane.

Reforma e re është veçanërisht e diskutueshme.

Ajo parashikon një bonus të konsiderueshëm mandatesh për partnerët e koalicionit, nëse ata marrin të paktën 42 për qind të votave në zgjedhjet parlamentare.

Opozita e majtë e akuzon Melonin se përmes kësaj reforme, po kërkon t’i japë partisë së saj, “Vëllezërit e Italisë”, një avantazh të padrejtë në zgjedhje. /