Italia dhe Franca njoftojnë një takim ndërkombëtar mbi parandalimin dhe shërimin nga varësia

Kryeministrja italiane Giorgia Meloni dhe presidenti francez Emmanuel Macron kanë njoftuar organizimin e një takimi ndërkombëtar për parandalimin dhe trajtimin e varësive.

Samiti do të zhvillohet më 23 tetor 2026 në komunitetin e rimëkëmbjes San Patrignano, pranë Rimininit në Itali, dhe do të mbledhë ministra, zyrtarë të lartë dhe përfaqësues të organizatave ndërkombëtare për të diskutuar praktikat më të mira në parandalimin, trajtimin, rehabilitimin dhe riintegrimin social të personave me varësi, me fokus të veçantë te të rinjtë.

Italia dhe Franca janë bashkëthemeluese të ECAD-it, Koalicionit Evropian kundër Varësive, i krijuar në kuadër të samitit të Komunitetit Politik Evropian më 2 tetor 2025. Deri tani, 35 vende i janë bashkuar këtij koalicioni, duke u angazhuar në luftën kundër trafikimit të drogës dhe në mbështetjen e programeve për parandalimin dhe shërimin nga varësitë.

Organizimi i takimit i është besuar nënsekretarit të Zyrës së Kryeministrit italian, Alfredo Mantovano, i cili do të koordinojë punën mes disa ministrive.

Në përfundim të samitit pritet të miratohet një dokument përfundimtar që do të përcaktojë udhëzimet dhe angazhimet e ardhshme të koalicionit për vitet në vijim.

Meloni dhe Macron kanë dërguar tashmë ftesa të përbashkëta për 47 delegacione, përfshirë krerë shtetesh dhe qeverish, partnerë të koalicionit dhe institucione evropiane