JAPONI – Rreth 24 orë pas tërmetit tragjik, të paktën 13 të vdekur dhe mijëra të evakuuar

– Kryeministrja e Japonisë, Sanae Takaichi deklaroi sot se operacionet e shpëtimit, pas tërmetit të fuqishëm në jug të vendit, janë kthyer në një “garë me kohën”, pasi ekipet e emergjencës po kërkojnë personat e bllokuar nën rrënoja, sipas BBC.

Tërmeti me magnitudë 6,8 ballë Rihter goditi dje prefekturën Kumamoto, në jugperëndim të Japonisë.

Sipas autoriteteve, deri tani janë konfirmuar 13 viktima, ndërsa operacionet e kërkim-shpëtimit vazhdojnë.

“Është vërtet një garë me kohën, për të shpëtuar njerëzit që mund të jenë ende të bllokuar nën rrënoja”, tha kryeministrja Takaichi, rreth 24 orë pas goditjes sizmike.

Kërkime në qendrën tregtare dhe fabrikë

Ekipet e shpëtimit po kontrollojnë rrënojat e “Qendrës Tregtare Aeon”, në qytetin Kashima, ku autoritetet kanë konfirmuar se disa persona ende rezultojnë të zhdukur.

Presidenti i qendrës tregtare, tha se tre persona janë ende të paidentifikuar, ndërsa tre të tjerë janë konfirmuar të vdekur.

Operacionet vijojnë gjithashtu në fabrikën e “Nippon Paper” në qytetin Yatsushiro, ku kryeministrja tha se ka ende persona që kanë nevojë për ndihmë.

Rreth 4 600 persona janë angazhuar në operacionet emergjente të kërkim-shpëtimit dhe ndihmës. Një shpërthim ka ndodhur në qendrën tregtare rreth një orë pas tërmetit.

Dëmtime në monumente historike dhe paralajmërim për të nxehtin

Tërmeti ka shkaktuar dëme të mëdha në prefekturën Kumamoto. Salla e lutjeve e Tempullit Yatsushiro, një objekt i shekullit XIX, u shemb, ndërsa pjesë të mureve të Kalës së Kumamotos pësuan dëmtime.

Autoritetet kanë paralajmëruar ekipet e shpëtimit dhe banorët e prekur, që të tregojnë kujdes ndaj goditjeve nga nxehtësia gjatë pastrimit të rrënojave, pasi temperaturat pritet të arrijnë deri në 35 gradë Celsius.

Rreth 7 700 persona janë evakuuar nga banesat e tyre. Prefektura Kumamoto është goditur edhe më parë nga tërmete të fuqishme.

Në prill të vitit 2016, dy tërmete me magnitudë 6,5 dhe 7,3 ballë Rihter goditën rajonin brenda dy ditësh, duke shkaktuar më shumë se 270 viktima. /