JEMEN – Forcat qeveritare nisin ofensivën ushtarake, avancojnë në ngushticën strategjike

SANA, 5 tetor /ATSH-DPA/- Forcat qeveritare të Jemenit nisën sot një ofensivë të gjerë ushtarake me synimin për të rimarrë kryeqytetin Sana nga rebelët Houthi, të mbështetur nga Irani, si dhe për të rikthyer kontrollin mbi Ngushticën strategjike Bab al-Mandabit.

Rashad al-Alimi, kryetar i Këshillit Presidencial të Jemenit, njoftoi nisjen e operacionit të quajtur “Agimi i Jemenit”, në një kohë kur në vend kanë vijuar prej disa javësh përleshjet e armatosura, në kuadër të luftës së gjatë civile.

Me nisjen e operacionit, burime ushtarake jemenase konfirmuan se forcat qeveritare ndërmorën një ofensivë në shkallë të gjerë për të rimarrë zonat që kontrollohen nga rebelët Houthi.

Sipas këtyre burimeve, Brigadat e Gjigantëve dhe Forcat e Mburojës së Kombit, dy formacione ushtarake që luftojnë në krah të forcave qeveritare, kanë avancuar në zonat përreth Ngushticës së Bab al-Mandabit, në jugperëndim të Jemenit.

Burimet thanë se këto njësi po zhvillonin luftime të ashpra me rebelët Houthi në zonën e Dhubabit, pranë Ngushticës së Bab al-Mandabit, dhe se ishin pranë ndërprerjes së plotë të rrugës së furnizimit që rebelët Houthi përdorin për të sjellë furnizime në këtë zonë.

Ndërkohë, agjencia jemenase e lajmeve “Saba”, e cila kontrollohet nga milicia Houthi, citoi një burim ushtarak të grupit duke thënë se raportimet për avancimin e forcave qeveritare drejt Dhubabit ishin “të pavërteta”.

Sipas burimit të rebelëve Houthi, këto raportime synonin të fshihnin atë që ai e përshkroi si “dështimin dhe humbjet e përsëritura” të forcave të mbështetura nga Arabia Saudite. /