Ushtria amerikane teston teknologjinë anti-dronë në kufirin me Meksikën, ndërsa kartelet përdorin dronët për kontrabandë

Ushtria amerikane po teston teknologji kundër dronëve në zonën e kufirit SHBA–Meksikë, në përpjekje për t’iu kundërvënë kërcënimit në rritje të përdorimit të dronëve nga kartelet dhe për të përvetësuar inovacionin e shpejtë të fushëbetejës nga lufta e Ukrainës me Rusinë, siç njofton Reuters.

Në stërvitjen “Falcon Peak” të Komandës Veriore të SHBA-së, mbajtur në shtator në Arizona, kompanitë e mbrojtjes demonstruan radarë, dronë përgjues, sisteme autonome armësh dhe teknologji të tjera për zbulimin, ndjekjen dhe shkatërrimin e dronëve të vegjël pa pilot, sipas raportimit të Reuters.

Sipas zyrtarëve të ushtrisë, dronët e karteleve janë kryesisht modele komerciale të gatshme, të përdorura për mbikëqyrje të lidhura me kontrabandën dhe trafikimin njerëzor. Gjenerali Brian Filler tha se ushtria ka zbuluar 378 hyrje dronësh në 30 ditët e fundit dhe se tendenca po rritet, njofton Reuters.

Ushtria ka rrëzuar 11 dronë të karteleve me lazer që nga vendosja e kësaj teknologjie në kufirin jugor në gusht; zyrtarët theksojnë se dronët e karteleve nuk krahasohen me ato të fushëbetejës në Ukrainë apo Lindjen e Mesme, por kufiri ofron mjedis real testimi jashtë laboratorit.

Në demonstrime u paraqit droni “Ghost” i Anduril-it, sistemi radar-dhe-kamera i Teledyne FLIR, mitralozi automatik anti-dronë “Bullfrog” i Allen Control Systems dhe një dron përgjues i Powerus-it — kompani që u listua në bursë të enjten përmes një bashkimi me një kompani të mbështetur nga djemtë e presidentit Donald Trump. Gjenerali Matt Ross tha, sipas raportimit të Reuters, se qëllimi është të përsëritet cikli i shpejtë i përshtatjes që shihet në Ukrainë.