Kalemaj: Trajtimi ndaj Metës është hakmarrje politike, diskriminim i pandërprerë

Pedagogu Ilir Kalemaj ka deklaruar se trajtimi ndaj ish-presidentit Ilir Meta në paraburgim përbën një formë hakmarrjeje politike dhe diskriminimi të vazhdueshëm.

I ftuar në emisionin “3 D nga” i gazetarit Alban Dudushi në RTSH 1, Kalemaj u shpreh se mënyra e arrestimit dhe kushtet e qëndrimit në qeli japin një mesazh të qartë për trajtim të pabarabartë.

Ai shtoi se, sipas vlerësimit të tij, Meta nuk paraqet rrezikshmëri që të justifikojë masa të tilla të ashpra sigurie.

“Është mesazhi i mënyrës së arrestimit, është mesazhi i diskriminimit të pandërprerë që i bëhet në qeli, ku është shprehur dhe Helsinki, dhe Avokati i Popullit dhe organizata të tjera të Shoqërisë Civile dhe në raportet e tyre kanë thënë se ka ndërprerje të energjisë elektrike, mungesë të ujit, e kanë privuar disa herë nga sporte etj. të gjitha këto forma të dënimit të vazhdueshëm që ne nuk e kemi parë në rastin e tjerëve të cilët janë në qeli tregojnë për një hakmarrje të zotit Meta. Ai nuk paraqet aty një rrezikshmëri të shoqëruar me një masë të tillë”, u shpreh Kalemaj.