Kampionati Kombëtar i 88-të i atletikës/ Vllaznia me rekord absolut, ish-futbollisti Muça ngjitet në pod, Gega sportistja e vitit

Dita e dytë dhe e fundit e Kampionatit Kombëtar të 88-të të atletikës kishte konfirmime dhe surpriza. Skuadra e Vllaznisë dominoi edicionin duke grumbulluar më shumë pikë se skuadrat e tjera ndërsa në planin individual shkëlqeu Luiza Gega. Gjithashtu për t’u nënvizuar ishte edhe performanca e ish-kapitenit të Tiranës, Gentjan Muça.

Ekipi shkodran, falë 167 pikëve, triumfoi për herë 30-të në historinë e atletikës shqiptare. Kuqeblutë kanë lënë pas ekipin e Skënderbeut dhe Teutës duke marrë këtë sukses për herë të 18-të radhazi.

Në planin individual këtë edicion e dominoi sportistja e Tiranës, Luiza Gega. Atletja mori pjesë në garën e saj të preferuar të 3000 metrave me pengesa, të cilën e dominoi me kohën 9:46.01. Falë 1129 pikëve të grumbulluara Gega u shpall edhe sportistja e turneut, një vlerësim ky, të cilin e merr prej 16 vitesh radhazi.

Një surprizë e këndshme e këtij edicioni ishte edhe vendi i tretë i marrë në disiplinën e 3000 metrave nga Gentjan Muça. Ish-futbollisti i njohur i Tiranës ka arritur një rezultat mjaft të mirë në këtë garë, të cilën e mbylli në vend të tretë me kohën 10:18.49. A.V.