Kapet në Shëngjin 22-vjeçari i kërkuar nga Spanja për tentativë vrasjeje

Një 22-vjeçar i shpallur në kërkim ndërkombëtar nga autoritetet spanjolle është arrestuar këtë të mërkurë në Shëtë të mërkurë në në Shëngjin me qëllim ekstradimin drejt Spanjës.

Policia e Shtetit bën me dije se operacioni i koduar “Fast” u finalizua nga Drejtoria e Forcës së Posaçme Operacionale, në kuadër të vijimit të operacioneve për lokalizimin dhe kapjen e personave të shpallur në kërkim ndërkombëtar.

Sipas njoftimit zyrtar, shërbimet policore siguruan informacione se një shtetas i kërkuar ndërkombëtarisht fshihej në qarkun e Lezhës. Pas shkëmbimit në kohë reale të informacionit me partnerët spanjollë përmes rrjetit ENFAST, u bë i mundur lokalizimi dhe arrestimi i tij në zonën e Shëngjinit.

Në pranga ra shtetasi O.P., 22 vjeç, lindur në Lezhë.

Autoritetet bëjnë të ditur se ai ishte shpallur në kërkim ndërkombëtar nga Interpol Madridi, pasi Gjykata e Ibizës në Spanjë kishte lëshuar ndaj tij urdhër arresti më 18 maj 2026 për veprën penale “vrasje e mbetur në tentativë”.

Ndërkohë, vijojnë procedurat ligjore për ekstradimin e 22-vjeçarit drejt Spanjës, ku do të përballet me drejtësinë për akuzat e ngritura ndaj tij.