Kërkesat e lexuara nga protestuesi Dritan Goxhaj, Rama: Zëdhënës i interesave të Iranit. Kur protestës t’i bien puplat fallco, PS do dalë më e fortë

Kryeministri Edi Rama ka reaguar pas leximit të kërkesave të protestuesve, duke i cilësuar ato si të lidhura me interesa të huaja. Përmes një reagimi publik, Rama ironizoi një pjesë të mbështetësve të protestës, të cilët sipas tij, kanë mohuar lidhjet e saj me interesa të caktuara.

“Si thoshin derrat e kënaqur migjenianë të segmentit ‘intelektual’ të protestës, nuk ka lidhje Irani…?”, shkruan Rama.

Rama tha se në fund të kësaj proteste, PS do të bëhet më e fortë dhe se qeveria do të përmirësohet ndjeshëm.

“Mos harroni çfarë ju kam thënë qysh në fillim: Dy fitimtarë do dalin kur kësaj proteste t’i bien të gjitha puplat fallco të flamingove, Partia Socialiste që do të bëhet më e fortë dhe qeverisja jonë që do të përmirësohet shumë ndjeshëm”, shkruan Rama.

Reagimi i kreut të qeverisë u shoqërua edhe me një video ku shfaqet protestuesi Dritan Goxhaj duke lexuar një listë kërkesash që, sipas tij, përfaqësojnë qëndrimet e protestuesve dhe i drejtohen kryeministrit.

Në videon e publikuar, Rama pretendon se deklarata e lexuar nga Goxhaj është e koordinuar duke e cilësuar atë si “zëdhënës të Iranit”.

“Deklarata është e koordinuar. Dritan Goxhaj lexoi deklaratën nga bulevardi. Po çfarë përfaqëson Dritan Goxhaj? Asgjë më shumë sesa një zëdhënës i interesave të Iranit. Asgjë më shumë se një zëdhënës”, thuhet në videon e publikuar nga Rama.

Ky reagim i Ramës vjen në ditën e 23-të të protestës, ku protestuesi Dritan Goxhaj, lexoi në emër të protestuesve, një sërë kërkesash që përfshijnë dorëheqjen e qeverisë, krijimin e një qeverie teknike, ndryshime kushtetuese dhe anulimin e ligjeve të konsideruara si të dëmshme për mjedisin dhe trashëgiminë kulturore.