Këshilli Kombëtar i PD vendos sot për kupolën e re të Partisë, kush ikën e kush vjen

Partia Demokratike mbledh sot Këshillin Kombëtar ku do të votohet për lidershipin e ri të kësaj partie që do të jetë në krahët e Berishës për fushatën e ardhshme elektorale.

Me interes të madh do të shihet procesi për sekretarin e përgjithshëm, me Flamur Nokën që pritet të kërkojë një mandat të dytë, por riviali ende nuk është shpallur.

Po ashtu edhe postet e nënkryetarëve, nga të cilët i vetmi që duket sikur e ka karrigen të sigurt është Gazment Bardhi për shkak të pozicionit që mban në Kuvend si kryetar i grupit parlamentar.

Përveç tij, burime për gazetarin e Euronews Albania, Ardit Hoxha bëjnë me dije se gara do të jetë një gërshetim mes disa personave me eksperiencë dhe të rinjve e të rejave që janë afruar kohët e fundit me PD.

Për sekretariatin ligjor gara pritet të jetë mes dy juristëve të rinj në PD, Franc Nuri dhe Marash Logu. Ndërkohë që me interes pritet të shihet edhe gara për sekretariatin organizativ dhe komisionin e apelimit në PD.

Ndërkohë mbetet për t’u parë nëse edhe për këtë process do të ndiqet e njëjta praktike si ajo për kryesinë dhe drejtimin e këshillit kombëtar, ku kandidaturat u prezantuan vetëm pak minuta para se të niste mbledhja.