Këshilltari i presidentit sirian mohon raportimet se Arabia Saudite i ka kërkuar Damaskut trupa për në Jemen

Këshilltari mediatik i presidentit sirian Ahmed al-Sharaa, Ahmad Muaffaq Zaidan, ka mohuar raportimet se Arabia Saudite i ka kërkuar Damaskut të dërgojë forca siriane në mbretëri apo në Jemen, shkruan Al Jazeera.

Në një postim në X, Zaidan tha se siguria e Arabisë Saudite dhe e Gjirit është e lidhur me sigurinë e Sirisë dhe se Damasku qëndron fort krah Rijadit, duke shtuar: “Ajo që disa media po promovojnë për kërkesën e mbretërisë për dislokimin e forcave siriane në Arabinë Saudite apo në Jemen është e rreme dhe nuk ka asnjë bazë të vërtetë”.

Mohimi vjen pas raportimeve të agjencisë Reuters, sipas të cilave Damasku po shqyrtonte dhënien e ndihmës ushtarake për Arabinë Saudite në luftën kundër Huthi-ve — histori të cilën edhe gazeta jonë e raportoi më herët. Zaidan nuk e mohoi solidaritetin me Rijadin, por vetëm pretendimin specifik për një kërkesë saudite për trupa siriane.

Në sfond, lufta në Jemen po përshkallëzohet me shpejtësi: sulmet Huthi ndaj aeroporteve saudite Abha dhe të Mbretit Khalid shkaktuan viktima civile, ndërsa koalicioni i udhëhequr nga Arabia Saudite vazhdon operacionin “Agimi i Jemenit” me pretendime për mijëra luftëtarë Huthi të neutralizuar.