Knezeviq nga Beogradi: Sërdanoviqi është kandidat i DPS-së — pa Vuçiqin nuk do ta kishim mundur kurrë Gjukanoviqin

Milan Knezeviq, kryetar i Partisë Demokratike Popullore (DNP) të Malit të Zi, mori pjesë në tribunën e Partisë Progresive Serbe (SNS) në komunën Stari Grad të Beogradit, të organizuar në kuadër të fushatës parazgjedhore në Serbi. Në fjalën e tij, Knezeviqi iu sul ashpër listës „Studentët fitojnë“ dhe bartësit të saj, si dhe ish-kryeministrit Zdravko Krivokapiq dhe kryeministrit aktual Millojko Spajiq.

Knezeviq deklaroi se bartësi i listës „Studentët fitojnë“, Ilija Sërdanoviqi, është „kandidat i DPS-së“ dhe pyeti publikisht nëse ai është mik personal i Millo Gjukanoviqit. Sipas tij, lista studentore nuk është gjë tjetër veçse një instrument i Partisë Demokratike të Socialistëve.

„Millo Gjukanoviqi nuk mund t’ia falë Aleksandër Vuçiqit 30 gushtin 2020“, tha Knezeviq nga tribuna e SNS-së. Ai shtoi se „po të mos kishte qenë Aleksandër Vuçiqi, lititë, Kisha Ortodokse Serbe dhe qytetarët që votuan, nuk do ta kishim mundur kurrë Millo Gjukanoviqin“, duke ia atribuuar kryetarit të Serbisë meritën kryesore për fitoren historike të opozitës në zgjedhjet e 30 gushtit 2020.

Knezeviq foli edhe për ish-kryeministrin Zdravko Krivokapiq dhe kryeministrin aktual Millojko Spajiq, për të cilët tha se përkrahin gjithashtu listën studentore. Të dy, sipas tij, janë kundër Vuçiqit „sepse ai i krijoi“, dhe me këtë qëndrim ata i shërbejnë axhendës së DPS-së dhe Millo Gjukanoviqit.

Nga Beogradi, kreu i DNP-së përsëriti edhe një herë qëndrimin e tij se krimineli i luftës Ratko Mlladiq është hero, duke thënë se nuk do të tërhiqet nga kjo bindje pavarësisht kritikave.

Në fund, ai deklaroi se çdo serb i ndershëm nga Mali i Zi dhe çdo malazez i ndershëm nga Mali i Zi me të drejtë vote në Serbi do të votojë për „Serbinë e Bashkuar“ dhe listën e kryesuar nga Aleksandër Vuçiq, duke i bërë thirrje diasporës të mobilizohet në zgjedhje.

Burimi: Portal Analitika