KOLUMBI – Një tërmet 7,4 ballë Rihter godet vendin duke shkaktuar të plagosur dhe dëme

BOGOTA, 10 gusht /ATSH-AFP/ – Një tërmet i fuqishëm goditi sot Kolumbinë dhe u ndje në qytete të mëdha si kryeqyteti, Bogotá, dhe Cali në jugperëndim të vendit, si dhe në Quito dhe Panama City, sipas autoriteteve dhe gazetarëve.

Ky tërmet, me magnitudë 7,4 në shkallën Rihter sipas Shërbimit Gjeologjik të SHBA-së dhe Kolumbisë, ndodhi herët në mëngjes në një thellësi prej rreth 100 kilometrash (60 milje).

Epiqendra e tij ishte e vendosur pranë San José del Palmar, në departamentin Chocó (perëndim), në bregdetin e Paqësorit.

Nuk u lëshua paralajmërim për cunami.

Autoritetet nuk kanë publikuar ende shifra mbi numrin e viktimave ose ndërtesave të prekura.

Por, guvernatori i Chocó shkroi në rrjetin social X se kishte “lëndime” dhe “dëme serioze në ndërtesa” në Quibdó, kryeqytetin e këtij departamenti të varfër.

Kryebashkiaku i Cali, qyteti i tretë më i madh i Kolumbisë, raportoi gjithashtu “dëme të konsiderueshme”, të cilat po vlerësohen duke përdorur dronë.

Media lokale transmetoi imazhe që tregojnë fasadat e ndërtesave të shkatërruara.

Tërmeti u ndje më fort në Kolumbinë perëndimore, dhe deri në Quito, kryeqytetin e Ekuadorit fqinj, dhe Panama.

Më 24 qershor, një tërmet i dyfishtë me magnitudë 7,2 dhe 7,5 ballë Rihter vrau më shumë se 6 000 njerëz në Venezuelë dhe shkaktoi shkatërrime të gjera.

Këto vende janë të vendosura në Unazën e Zjarrit të Paqësorit, një zonë me aktivitet të lartë sizmik dhe vullkanik për shkak të lëvizjeve të pllakave tektonike, veçanërisht Pllakës Nazca dhe Pllakës së Karaibeve të cilat po zhyten nën Pllakën e Amerikës së Jugut./ a.jor.