KOMENT – Burnham mbështet një kushtetutë të shkruar britanike

LONDËR, 2 gusht /ATSH-AFP/ – Kryeministri i ri britanik, Andy Burnham ka deklaruar mbështetjen e tij për miratimin e një kushtetute të shkruar për Mbretërinë e Bashkuar, e cila, ndryshe nga shumica e vendeve, nuk ka një tekst të vetëm autoritar.

Që nga marrja e detyrës vetëm dy javë më parë, ish-kryetari i bashkisë së Mançesterit të Madh e ka bërë decentralizimin e pushteteve tek autoritetet rajonale një përparësi për qeverinë e tij.

“Në fund të fundit, mendoj se kjo hap rrugën për një marrëveshje të re kushtetuese”, tha Burnham këtë fundjavë në lidhje me planet e tij të decentralizimit.

Duke bërë thirrje për “një grup të ri parimesh të qarta se si duhet të drejtohet ky vend”, kryeministri theksoi nevojën për një kushtetutë të shkruar, një reformë që ai e kishte mbështetur tashmë para se të mbërrinte në ”Downing Street”.

“Është anormale që njerëzit të detyrohen të mbrojnë gjëra që janë thjesht themelore… dhe mungesa e një kushtetute i privon territoret nga mjetet për të vepruar”, deklaroi  Burnham.

Mbretëria e Bashkuar qeveriset nga një koleksion heterogjen ligjesh, vendimesh të gjykatave të së drejtës zakonore dhe traktatesh.

Ideja e një kushtetute të shkruar është relativisht e kohëve të fundit në Mbretërinë e Bashkuar.

Ish-kryeministri laburist Gordon Brown (2007–2010), ministrat e të cilit përfshinin Andy Burnham, ishte një nga të parët që mbështeti një reformë të tillë.

Një komision parlamentar shqyrtoi opsionet e ndryshme për kodifikimin e Kushtetutës si pjesë e një shqyrtimi pesëvjeçar, i cili arriti në përfundimin në vitin 2015 se nuk kishte konsensus të qartë për këtë çështje.

Çdo përpjekje për të kodifikuar Kushtetutën, e udhëhequr nga Andy Burnham, ka të ngjarë të kërkojë disa vite punë, si dhe hetim dhe konsultime të gjera publike.

Të premten, Andy Burnham njoftoi planet për t’u lejuar kryetarëve të bashkive rajonale të Anglisë të mbajnë një pjesë të taksave të mbledhura brenda juridiksioneve të tyre, si pjesë e projektit të tij për të deleguar pushtetet nga kryeqyteti i këtij vendi shumë të centralizuar.

Mbretëria e Bashkuar – e përbërë nga Anglia, Skocia, Uellsi dhe Irlanda e Veriut – ndërmori reforma të rëndësishme kushtetuese në fund të viteve 1990, duke çuar në krijimin e parlamenteve të deleguara në Edinburg, Cardiff dhe Belfast.

Megjithatë, sipas ekspertëve, Anglia mbetet një nga vendet më të centralizuara në Evropë, pavarësisht krijimit të disa këshillave rajonale dhe organeve të tjera gjatë dekadës së fundit./  a.jor.