KOMENT – ”Gemelli” spitali i papëve, ku do të operohet edhe Leone XIV

ROMË, 13 tetor /ATSH-AFP/ – Spitali ”Gemelli” i Romës, ku Leone XIV është planifikuar të operohet për një nodul në mushkëri, njihet si “spitali i papëve” dhe madje u quajt edhe “Vatikani tre” nga papa Gjon Pali II.

Papa amerikan do të shtrohet sot për një qëndrim prej afërsisht një jave në këtë strukturë të madhe të vendosur në veriperëndim të kryeqytetit italian, ku papët kanë një kat të rezervuar për ta.

Paraardhësi i tij argjentinas, papa Françesku (2013-2025), pati katër qëndrime atje për probleme të ndryshme shëndetësore: një operacion për hernie abdominale në qershor 2023, një infeksion respirator në mars të të njëjtit vit, operacion në zorrën e trashë në korrik 2021 dhe pneumoni të dyfishtë në dimrin e vitit 2025, disa javë para vdekjes së tij në moshën 88-vjeçare.

Gjatë qëndrimit të tij të fundit, i cili zgjati pesë javë, salla kryesore e spitalit priti konferenca për shtyp të mbajtura nga mjekët e tij para gazetarëve nga e gjithë bota.

Në ditën e daljes së tij nga spitali në mars të vitit 2025, papa argjentinas u shfaq shumë i dobët në ballkon, nën duartrokitjet entuziaste të qindra besimtarëve të mbledhur jashtë spitalit, një imazh që u bë viral.

Papa Gjon Pali II (1978-2005) ishte trajtuar nëntë herë dhe kishte kaluar gjithsej 153 ditë atje, duke e bërë atë të deklaronte me shaka se “Vatikani numër një është sheshi i Shën Pjetrit, Vatikani numër dy është Castel Gandolfo (një rezidencë verore pranë Romës), dhe ky spital është bërë Vatikani numër tre”.

Qëndrimet e tij të përsëritura dhe të zgjatura në ”Gemelli” e shtynë Vatikanin të krijonte një rezidencë të vogël atje.

Për arsye sigurie, apartamenti i papës ndodhet në katin X dhe të sipërm dhe aksesohet nëpërmjet një korridori të gjatë nën mbikëqyrje të vazhdueshme nga policia italiane dhe xhandarmëria e Vatikanit.

Ky apartament i vogël, i lyer me të bardhë, i mobiluar me mobilje të thjeshta, përmban një shtrat, një televizor, një banjo, një kuzhinë, pajisje mjekësore dhe një faltore të vogël.

– Spitali më i madh në Romë –

Kjo dhomë papnore u krijua nga e para në maj të vitit 1981 kur Gjon Pali II u plagos rëndë nga të shtënat me armë zjarri në sheshin e Shën Pjetrit nga turku Mehmet Ali Agca, përpara se të dërgohej me urgjencë në Spitalin Gemelli për një ndërhyrje kirurgjikale urgjente.

Gjon Pali II, organet jetësore të të cilit mbetën të padëmtuara, iu nënshtrua një procedure të madhe kirurgjikale që zgjati gati gjashtë orë, por konstitucioni i tij i fortë i lejoi të kapërcente këtë përvojë të vështirë.

Ai u kthye atje disa herë, dy të fundit në vitin 2005, vetëm disa javë para vdekjes së tij.

Pasardhësi i tij, Benedikti XVI, nuk do ta vizitonte spitalin ”Gemelli”, të paktën jopublikisht.

I përuruar në vitin 1964, spitali ”Gemelli”, emri i plotë i të cilit është “Fondacioni i Poliklinikës Universitare ‘Agostino Gemelli”, është spitali më i madh në Romë.

Më shumë se 5 000 persona punojnë atje, sipas faqes së tij të internetit.

Është pjesë e Universitetit të Zemrës së Shenjtë, një universitet katolik i themeluar në vitin 1921 në Milano dhe që konsiderohet si universiteti më i madh katolik në Evropë, me disa kampuse në Itali./ a.jor.