Komisioni Evropian propozon mbylljen e përkohshme të shtatë kapitujve negociues me Malin e Zi

Komisioni Evropian ka propozuar mbylljen e përkohshme të shtatë kapitujve në negociatat e anëtarësimit të Malit të Zi në Bashkimin Evropian, siç njofton Vijesti. Bëhet fjalë për kapitujt 1 – Lëvizja e lirë e mallrave, 12 – Siguria ushqimore, politika veterinare dhe fitosanitare, 15 – Energjia, 17 – Politika ekonomike dhe monetare, 18 – Statistika dhe 19 – Politika sociale dhe punësimi.

Propozimi doli në dritë nga një dokument i publikuar të premten në faqen e parlamentit holandez, të cilit ia dorëzoi ministri i Jashtëm i Holandës, Tom Berendsen. Sipas të njëjtit dokument, parlamenti holandez ishte njoftuar më herët edhe për propozimin e mbylljes së përkohshme të kapitullit 14 – Politika e transportit.

Në dokument, siç raporton Vijesti, thuhet se qeveria holandeze e vlerëson situatën e përgjithshme në Mal të Zi, përfshirë sundimin e ligjit, në një mënyrë që e justifikon një qasje kritike konstruktive ndaj propozimeve të Komisionit. Haga synon të mbështesë mbylljen e përkohshme të kapitujve 12, 17, 18 dhe 19, duke këmbëngulur që Komisioni të vazhdojë monitorimin e rreptë edhe pas mbylljes së tyre. Për kapitujt 1 dhe 15, shqyrtimi në Këshill ka nisur së fundmi dhe Haga synon t’i mbështesë, nëse jepen përgjigje për disa çështje të hapura.

Sipas bashkëbiseduesit të Vijesti-t, parlamenti holandez tani mund të parashtrojë pyetje — një hap i domosdoshëm para se qeveria e tij t’i komunikojë zyrtarisht Këshillit të BE-së dritën jeshile për mbylljen e kapitujve. Mbledhja e Këshillit për Çështje të Përgjithshme të BE-së mbahet më 13 tetor, dhe në margjinat e saj mund të organizohet një konferencë ndërqeveritare për ta shënuar zyrtarisht hapin, nëse arrihet pajtimi i të gjitha shteteve anëtare.

Në të njëjtin dokument, Komisioni propozon edhe mbylljen e përkohshme të kapitullit 20 – Sipërmarrja dhe politika industriale në negociatat me Shqipërinë, pasi Tirana i përmbush kriteret, veçanërisht për strategjinë industriale dhe politikat ndaj ndërmarrjeve të vogla e të mesme, siç citohet nga Vijesti.