KONATAR: TË ULET TVSH-ja PËR KARBURANTET DHE TË MBROHEN QYTETARËT E EKONOMIA

_{Foto: Vijesti}

Deputeti i Lëvizjes Qytetare URA, Millosh Konatar, i ka bërë thirrje Qeverisë së Malit të Zi që përkohësisht të ulë TVSH-në për karburantet gjatë tre muajve të ardhshëm, me qëllim mbrojtjen e qytetarëve dhe ekonomisë.

Konatar tha se ulja e herëpashershme e akcizave nuk është e mjaftueshme për të frenuar rritjen e çmimeve të karburanteve.

Sipas tij, shteti duhet të marrë masa shtesë për të zbutur pasojat e krizës dhe për të mbrojtur standardin e jetesës.

Ai theksoi se rritja e çmimit të karburanteve nuk ndikon vetëm te konsumatorët në pompa, por përmes transportit dhe kostove të biznesit reflektohet edhe në çmimet e mallrave dhe shërbimeve të tjera.

Konatar vlerësoi se ulja e përkohshme e TVSH-së duhet të jetë pjesë e një pakete më të gjerë masash, e cila do të ndihmonte në frenimin e rritjes së çmimeve dhe në mbështetjen e qytetarëve dhe ekonomisë.