Konflikti Arbeloa-Mbappé/ Trajneri e zëvendësoi që publiku ta vërshëllente, sulmuesi tregon se nuk ndjek konferencat e tij për shtyp

Fitorja përballë Oviedo-s sigurisht që nuk do të shërbente për të qetësuar “luftën” që është ndezur në kampin madrilen. Mediet spanjolle kanë nxjerrë në pah lëvizjet që protagonistët kanë bërë për të nxjerrë në dritë “të keqe” njëri-tjetrin.

Gazetari Juanma Castaño ka analizuar motivet që kanë pasuruar edhe më shumë konfliktin mes Kylian Mbappé dhe Álvaro Arbeloa. Sipas tij trajneri ka vendosur që të mos e aktivizojë sulmuesin për 69 minuta me vullnet të plotë për ta acaruar. Madje edhe zëvendësimi i tij për një beniamin të tifozëve siç është Gonzalo Garcia nuk ishte rastësi. Në ato çaste “Bernabeu” vërshëlleu francezin, i cili më shumë se kurrë është ekspozuar me sjellen e tij.

Sipas gazetarit ajo që ndodhi mbrëmë tregon se në Madrid nuk ka qetësi pasi të gjitha palët po luftojnë për egon e vet dhe se në ekip për momentin mungon një figurë bashkuese.

Edhe fjalët e sulmuesit francez nuk janë aspak të lehtë. Nëse Arbeloa e ka “luftuar” me vendime, sulmuesi i është përgjigjur me fjalë. Në fund të ndeshjes Kylian Mbappé tha se trajneri i kishte thënë se ishte “sulmuesi i katërt”. Fjali kjo e përgënjeshtruar nga vetë Arbeloa. Kylian Mbappé gjithashtu tha se nuk ndiqte konfernecat për shtryp të Arbeloa-s pasi në shtëpi kishte vetëm televizione franceze dhe jo spanjolle.