Konjufca nga Nju Jorku për 3-vjetorin e sulmit në Banjskë: Kriminelët vazhdojnë të jenë të lirë në Serbi

Zëvendëskryeministri dhe ministri i Punëve të Jashtme dhe Diasporës, Glauk Konjufca, u referua nga Nju Jorku sulmit terrorist në Banjskë, nga i cili nesër, më 24 shtator, shënohen tre vjet. Në atë sulm u vra rreshteri i Policisë së Kosovës, Afrim Bunjaku.

Konjufca rikujtoi se kriminelët që kryen sulmin vazhdojnë të jenë të lirë në Serbi, duke nënvizuar se Banjska dëshmon qartë pse llogaridhënia është e domosdoshme për sigurinë dhe stabilitetin rajonal.

Ai iu referua edhe sulmit të vitit 2024 ndaj kanalit Ibër-Lepenc, që ka rol kyç në furnizimin me ujë dhe në funksionimin e sistemit energjetik të Kosovës. Konjufca nënvizoi se qëndrueshmëria dhe mbrojtja e sistemeve kritike nga sabotimi, sulmet kibernetike dhe kërcënimet hibride duhet të jenë pjesë e pandashme e sigurisë rajonale.

Sipas komunikatës së ministrisë, Konjufca theksoi se Kosova u përball me të dyja këto sulme dhe doli fitimtare, duke shtuar se vendi është i gatshëm të japë kontribut konkret në përgjigjen e përbashkët rajonale ndaj sulmeve të tilla.

Burimi: Klan Kosova