Kontrolle të shtuara ndaj motomjeteve, procedohen 19 persona dhe sekuestrohen 19 mjete elektrike

Policia Rrugore e Tiranës ka intensifikuar kontrollet ndaj drejtuesve të motomjeteve, pas shqetësimeve të shtuara për manovrat e rrezikshme dhe shkeljet që cenojnë sigurinë rrugore.

Përmes një njoftimi të shpërndarë për mediat policia bën me dije se gjatë kontrolleve të zhvilluara në dy ditët e fundit, janë konstatuar 19 shtetas që drejtonin motomjete elektrike pa lejen përkatëse të drejtimit. Për të gjithë këta persona ka nisur procedimi penal për veprën penale “Drejtimi i automjeteve në mënyrë të parregullt”, ndërsa 19 motomjetet janë sekuestruar.

Krahas procedimeve penale, Policia Rrugore ka vendosur edhe 530 masa administrative për shkelje të ndryshme të rregullave të qarkullimit.

Masat janë ndarë si më poshtë:

371 masa për mosvendosjen e kaskës mbrojtëse;

76 masa për qarkullim në korsitë e dedikuara për biçikleta dhe në hapësirat për këmbësorët;

28 masa për kryerje manovrash të rrezikshme dhe mosrregullim të shpejtësisë në qendrat e banuara;

21 masa për shkaktim zhurmash përmes sistemit të shkarkimit të gazrave;

18 masa për motomjete pa shenja dalluese ose targa;

10 masa për tejkalim të shpejtësisë së lejuar;

6 masa për drejtim pa lejen përkatëse.