Kosova aderon në Konventën Ndër-Amerikane për Vuajtjen e Dënimeve Penale Jashtë Vendit

Qeveria e Kosovës ka miratuar në parim nismën për aderimin e Kosovës në Konventën Ndër-Amerikane për Vuajtjen e Dënimeve Penale Jashtë Vendit, siç njofton Klan Kosova. Vendimi u mor në mbledhjen e 3-të të qeverisë dhe synon forcimin e sundimit të ligjit, bashkëpunimit ndërkombëtar në çështjet penale, si dhe subjektivitetin ndërkombëtar të Kosovës.

“Qëllimi i kësaj Konvente është forcimi i mëtejmë i bashkëpunimit juridik ndërkombëtar në fushën e transferimit të personave të dënuar, me qëllim që personat e dënuar të vuajnë dënimin në shtetin e tyre të origjinës, në përputhje me standardet ndërkombëtare dhe me respektimin e të drejtave themelore të njeriut”, tha ministrja e Drejtësisë, Donika Gërvalla, në ekspozen e kësaj nisme.

Ajo shtoi, gjithnjë sipas Klan Kosova, se nisma do të kontribuojë në zgjerimin e bashkëpunimit juridik të Kosovës, veçanërisht me shtetet e Amerikës Latine, si dhe në krijimin e mundësive për vuajtjen e dënimit më afër familjes dhe shoqërisë, duke mbështetur proceset e rehabilitimit dhe riintegrimit të personave të dënuar.