Kryeministri izraelit, Netanyahu: Katari është një shtet armiqësor!

Kryeministri izraelit Benjamin Netanyahu ka hedhur poshtë pretendimet se Katari ka ndikuar në politikën e Izraelit gjatë luftës në Gaza, duke e cilësuar Dohën si një “shtet armiqësor”.

“Katari është një shtet armiqësor, por Katari nuk është një shtet që ka diktuar diçka këtu”, deklaroi Netanyahu, ndërsa mbrojti vendimet e qeverisë së tij.

Duke iu referuar sulmit izraelit në Doha në shtator të vitit 2025, Netanyahu tha: “Unë sulmova Katarin, unë gjithashtu e bombardova atë.”

Sulmi kishte në shënjestër zyrtarë të lartë të Hamasit, të cilët ndodheshin në Doha në kuadër të negociatave për një propozim armëpushimi në Gaza të mbështetur nga Shtetet e Bashkuara. Gjashtë persona u vranë, mes tyre edhe një pjesëtar i forcave të sigurisë së Katarit, ndërsa Hamasi deklaroi se ekipi i tij i lartë negociator i mbijetoi sulmit.

Katari e dënoi ashpër operacionin, duke e cilësuar atë si shkelje të sovranitetit të vendit. Më vonë gjatë të njëjtit muaj, Netanyahu i kërkoi falje Katarit gjatë një telefonate me presidentin amerikan Donald Trump dhe kryeministrin e Katarit, duke u zotuar se një sulm i tillë nuk do të përsëritej.

Komentet e fundit të Netanyahut erdhën teksa ai mbrojti qeverinë e tij për çështjen e transferimit të fondeve nga Katari drejt Gazës përpara sulmit të Hamasit ndaj Izraelit më 7 tetor 2023.

Sipas Netanyahut, fondet ishin destinuar për qëllime humanitare dhe transferimet ishin rekomanduar nga agjencitë izraelite të sigurisë.

Katari, nga ana tjetër, ka mohuar vazhdimisht akuzat për financimin e Hamasit. Doha ka deklaruar se ndihma e saj ishte destinuar për popullsinë palestineze në Gaza dhe u transferua përmes mekanizmave të njohur dhe të pranuar nga Izraeli dhe Shtetet e Bashkuara.