Kryeministri Rama mbledh sot Grupin Parlamentar të PS-së në mbledhje të zgjeruar, agjenda e plotë

Partia Socialiste do të zhvillojë këtë të shtunë, në orën 10:00, mbledhjen e zgjeruar të grupit parlamentar në Pallatin e Brigadave.

Mbledhja vjen në një moment të ndjeshëm politik, kur prej disa ditësh në vend po mbahen protesta qytetare kundër projektit të parashikuar në Zvërnec dhe ndryshimeve në ligjin për zonat e mbrojtura.

Po ashtu, takimi zhvillohet në një kohë kur mazhoranca përballet edhe me largimin e një deputeteje nga radhët e saj, atë të Marjana Koçekut, e cila kryesonte listën e socialistëve të Shkodrës.

Sipas axhendës të zbuluar një ditë më parë nga gazetarja e Euronews Albania, Eksiola Shehu, fjalën hapëse mësohet se do ta ketë kryetari i grupit parlamentar të PS-së, Taulant Balla, e më pas kryeministri dhe njëherësh kryetari i PS-së, Edi Rama.

Po ashtu, në përfundim të mbledhjes do të kenë fjalën si kryeministri, ashtu edhe kryetari i grupit. Mbledhja është parashikuar gjithashtu të zgjasë deri në orën 17:00.

4 janë pikat kryesore në agjendë që kanë të bëjnë me: -Informim mbi konkluzionet e Konferencës së 8-të Ndërqeveritare Shqipëri-BE dhe ecurinë e negociatave të anëtarësimit.

-Informim mbi paketën e ligjeve që lidhen me procesin e anëtarësimit të Shqipërisë në BE. -Informim mbi procedurat e ndjekura deri më tani për investimin në Zvërnec dhe interesin e shprehur për zhvillimin turistik të ishullit të Sazanit. -Informim mbi ecurinë e Reformës Administrative Territoriale.