Kubë, Oliver Stone lavdëron Castron

Në festivalin ndërkombëtar të filmit në Havana, regjisori amerikan Oliver Stone nuk ia kurseu lëvdatat ish-udhëheqësit revolucionar të Kubës, Fidel Castro, të cilin e quajti një personazh për të gjitha stinët.

Për Stone, i cili gjendet në ishullin e Karaibeve për të promovuar filmin e tij të ri “Snowden”, Amerika Latine dhe Kuba janë një subjekt i njohur. Ai ka punuar për 3 dokumentarë ku përfshihet Kuba: “Comandante” në vitin 2003, “Buscando a Fidel” në 2005-n dhe “Castro in Winter” në 2012-n.

I ndërgjegjshëm për trashëgiminë përçarëse të të ashtuquajturit “lider maximo”, Stone foli për atë duke e konsideruar si një njeri, të cilit do t’i ndihet mungesa.

“Ai iku. Shumë njerëz mendojnë se shkoi në ferr, të tjerë e shohin në parajsë. Por e vërteta është se ai iku dhe ne të gjithëve do të na mungojë. Castro ishte një personazh për të gjitha stinët, i cili i frymëzonte dramaturgët me mendjen dhe energjinë e tij të mrekullueshme”, tha Oliver Stone.

Stone shquhet për pasqyrimet kontroverse të momenteve kyçe të historisë amerikane në filmat e tij, teksa ka vënë shpesh në pikëpyetje besueshmërinë e qeverisë amerikane.

Me filmin e tij të ri, ai sjell në ekran historinë e Edward Snowdenit, kontraktorit të Agjencisë Kombëtare të Sigurisë (NSA), i cili zbuloi programet masive të përgjimit të qeverisë amerikane. Ai u arratis nga SHBA-të në vitin 2013, duke siguruar aliz politik në Rusi.