Kuçovë, asfiksohen nga gazi, vdesin 3 gra të një familjeje, rëndë një tjetër

Tre gra kanë humbur jetën, si pasojë asfikimit nga gazi brenda në banesë.

Ngjarja ka ndodhur rreth orës 14:30 të ditës së sotme në fshatin Polovinë të Kuçovës.

Mësohet se viktimat ishin anëtare të së njëjtës familje, motrat Ryzbie Toska, 60 vjeç dhe Resmie Selenica, 63 vjeç, si dhe Refije Yzaj, 80 vjeç. Ndërsa Mine Dyrma, 90 vjeç, nëna e dy viktimave ndodhet në gjendje kritike për jetën, e cila është transportuar drejt spitalit të Beratit.

Paraprakisht mësohet se gazi përdorej për ngrohje. Pas fikjes së zjarrit, policia në bashkëpunim me banorë të fshatit ka nisur punën për njerrjen e trupave të pajetë nga banesa.

Ndërkohë kanë nisur edhe hetimet, për zbardhjen e plotë të kësaj ngjarjeje që u mori jetën tre grave.

Ky është rasti i dytë i asfiksimit me pasojë vdekjen për këtë vit. Jo më larg se dje, 20-vjeçari Ervin Panaori gjeti vdekjen në orët e para të mëngjesit në Roskovec të Fierit si pasojë e asfikisë. Ndërsa mbrëmjen e 14 dhjetorit të vitit që sapo lamë pas, humbi jetën 64 vjeçari Simon Thanasi nga rrethi i Kuçovës.