​Kurti paralajmëron masa disiplinore dhe penale ndaj zyrtarëve që neglizhuan rastin e Arlinda Zekajt

Kryeministri i Kosovës, Albin Kurti, ka kërkuar përgjegjësi disiplinore dhe penale për të gjithë zyrtarët institucionalë që kanë neglizhuar detyrat e tyre në rastin e vrasjes së Arlinda Zekajt.

Në fjalën e tij në mbledhjen e 64-të të Këshillit të Përgjithshëm, Kurti ka thënë se rasti i Arlindës dëshmon se edhe kur gratë denoncojnë dhunën dhe kërkojnë mbrojtje institucionale, ato sërish mund të mbeten pa mbrojtje.

“Vrasja e Arlinda Zejkajt na ka përballur edhe një herë me një të vërtetë të rëndë se një grua mund të ndjekë të gjitha rrugët që i parasheh ligji, të denoncojë dhunën, të kërkojë mbrojtje, madje të paralajmërojë me shkrim se i rrezikohet jeta dhe prapë të përfundojë e vrarë. Arlinda bëri atë që institucionet kërkojnë gratë ta bëjnë kur përballen me dhunë”, ka thënë Kurti.

Ai ka theksuar se do të angazhohen që secili zyrtar që nuk i ka kryer detyrat të mbajë përgjegjësi.

“Me këtë rast, e ritheksoj se do të angazhohemi deri në fund që secili zyrtar përgjegjës që nuk e ka kryer detyrën të japë përgjegjësi, jo vetëm disiplinore, por edhe penale. Secili përgjegjës dhe secila përgjegjësi e secilës hallkë duhet të hetohet. Kushdo që ka neglizhuar punën apo ka bërë shkelje të detyrimeve ligjore duhet të japë përgjegjësi dhe do të përballet me masa disiplinore dhe penale”, ka deklaruar ai.

Kurti ka folur edhe për ndikimin e mendësisë patriarkale në shoqëri, duke thënë se ajo vazhdon ta trajtojë gruan si pronë dhe vendimin e saj për t’u larguar nga një marrëdhënie si cenim të autoritetit mashkullor.

“Kjo mendësi nuk ndryshon vetëm me ligje, ajo kërkon përballje të vazhdueshme në familje, në shkolla, në institucione dhe brenda vetë organizimeve e subjekteve tona politike”, ka thënë ai.

Kreu i Qeverisë ka përmendur edhe nevojën për ndryshime në sistemin arsimor, duke theksuar se edukimi për barazinë, respektin dhe zgjidhjen e konflikteve pa dhunë duhet të nisë që në fëmijëri.

“Nuk mund të vazhdojmë t’i edukojmë vajzat që të jenë të dëgjueshme e të durueshme, ndërsa djemtë që të jenë, patjetër, dominues. Këto role të trashëguara duhet t’i shqyrtojmë me guxim, edhe në tekstet shkollore, edhe në mënyrën se si i edukojmë fëmijët”, ka deklaruar Kurti.

Ai ka shtuar se lufta kundër femicidit kërkon edhe politika arsimore, ekonomike e sociale që synojnë fuqizimin dhe pavarësinë e grave.

“Duhet të fillojmë nga mënyra se si i edukojmë fëmijët, si i ndajmë përgjegjësitë brenda familjes, si u garantojmë grave të drejtat pronësore dhe si u mundësojmë atyre pavarësi ekonomike. Barazia gjinore duhet ta luftojë pabarazinë edhe shoqërore, dhe ajo duhet të dëshmohet në vendimet që marrim, në politikat që zbatojmë dhe mënyrën se si ne i mbrojmë gratë kur rrezikohet jeta, meqenëse barazia gjinore ndodhet në themelet e asaj shoqërie”, ka thënë Kurti. /kp/