Kushtetuesja rrëzoi kërkesën e 44 deputetëve të opozitës për zgjedhjen e tij, reagon Avokati i Popullit

Avokati i Popullit, Endri Shabani, ka reaguar pas vendimit të Gjykatës Kushtetuese për rrëzimin e kërkesës së 44 deputetëve të Partisë Demokratike, të cilët kundërshtuan procedurën e ndjekur nga Kuvendi për zgjedhjen e tij në këtë detyrë.

Përmes një reagimi, Shabani u shpreh se respekton vendimin e Gjykatës Kushtetuese, e cila, sipas tij, verifikoi procedurën e ndjekur nga Kuvendi dhe konstatoi se ajo është në përputhje me Kushtetutën.

“Avokati i Popullit respekton vendimin e Gjykatës Kushtetuese, e cila, me kërkesë të një grupi deputetësh, verifikoi procedurën e ndjekur nga Kuvendi për zgjedhjen e titullarit të institucionit dhe konstatoi se ajo është në përputhje me Kushtetutën”, shkruan Shabani.

Ai thekson se gjatë shqyrtimit të çështjes, institucioni që ai drejton ka ruajtur paanshmërinë ndaj palëve, duke mos mbajtur qëndrim për themelin e çështjes.

“Në këtë çështje, Avokati i Popullit ruajti paanshmërinë ndaj kërkuesve dhe Kuvendit duke mos mbajtur qëndrim për themelin e çështjes dhe duke ia besuar vlerësimin tërësisht Gjykatës, së cilës i përket interpretimi përfundimtar i Kushtetutës”, shprehet ai.

Sipas Shabanit, vendimi i Gjykatës Kushtetuese i jep përgjigje pikëpyetjeve të ngritura mbi procedurën e zgjedhjes së tij.

“Vendimi i sotëm i jep përgjigje çdo pikëpyetjeje mbi procedurën e zgjedhjes”, shkruan Avokati i Popullit.

Në përfundim të reagimit, Shabani thekson se institucioni do të vijojë punën për mbrojtjen e të drejtave të njeriut.

“Avokati i Popullit vijon punën për mbrojtjen e të drejtave të njeriut”, përfundon ai.