Ledia Kostandini prezanton instalacionin “Për aq kohë sa duhet” në ditën e dytë të Gjon Mili Video Art Festival

Në ditën e dytë të Gjon Mili Video Art Festival, artistja Ledia Kostandini prezantoi në Dhërmi instalacionin tekstil “Për aq kohë sa duhet”, një vepër e vendosur në hapësirën publike të fshatit.

Përmes këtij instalacioni, artistja vijon kërkimin e saj mbi tekstilin si bartës të kujtesës, kohës dhe përvojës njerëzore. E mbështetur në traditat e qëndisjes dhe punës artizanale, vepra sjell në vëmendje praktika që kanë shoqëruar jetën e komuniteteve ndër breza.

Instalacioni përbëhet nga shtresa të shumta tekstili gjysmëtransparent, të cilat ndryshojnë pamje në varësi të dritës dhe këndvështrimit, duke zbuluar figura hibride që shfaqen dhe transformohen vazhdimisht.

Krijesat e paraqitura në vepër janë frymëzuar nga afresket dhe figurat mistike të Kishës së Shën Mërisë në Dhërmi. Ato paraqiten si qenie gjysmë njeri dhe gjysmë zog, të vendosura mes tokës dhe qiellit, duke krijuar një lidhje mes elementeve natyrore dhe përfytyrimit artistik.

E vendosur në mjedisin karakteristik të bregdetit jugor, vepra trajton temën e lëvizjes, largimit dhe rikthimit, duke reflektuar mbi marrëdhënien mes njeriut, natyrës dhe kujtesës.

Instalacioni është pjesë e programit artistik të edicionit të katërt të Gjon Mili Video Art Festival, i cili po zhvillohet në Dhërmi me pjesëmarrjen e artistëve nga Shqipëria dhe vende të tjera.