Ligji për shtetësisë, Rashiq: Frikë për përfitime nga persona me dosje kriminale dhe lidhje me krime lufte

Ministri në detyrë për Komunitete dhe Kthim, Nenad Rashiq, ka shprehur shqetësim për, siç tha ai, një fluks të qytetarëve serbë që po regjistrohen në komunat e Kosovës, duke paralajmëruar pasoja demografike, politike dhe financiare.

Rashiq tha se në disa komuna ku më herët ekzistonte një balancë ndëretnike, regjistrimet e fundit mund të ndikojnë në ndryshimin e strukturës demografike. Sipas tij, vetëm rreth 30 persona janë regjistruar deri më tani, por ai paralajmëroi se trendi mund të rritet.

Ai theksoi gjithashtu se çdo qytetar i regjistruar do të përfitojë nga skemat sociale dhe mbështetjet shtetërore, përfshirë pensionet, ndihmat sociale, subvencionet bujqësore dhe mbështetje të tjera financiare, gjë që sipas tij mund të krijojë barrë shtesë për buxhetin e Kosovës.

Në të njëjtën linjë, në debat është përfshirë edhe çështja e ligjit për shtetësinë, ku janë ngritur shqetësime për mundësinë e përfitimit të shtetësisë nga persona me histori kriminale apo familjarë të personave të dënuar për krime lufte.

Ekspertë të sigurisë kanë theksuar se institucionet si Agjencia e Inteligjencës së Kosovës dhe mekanizmat verifikues duhet të kenë rol vendimtar në filtrimin e aplikimeve, duke vlerësuar nëse aplikantët paraqesin rrezik për sigurinë e vendit.

Rashiq ka shtuar se ligji aktual për shtetësinë ka mangësi në aspektin e sigurisë dhe kontrollit, duke lënë hapësira që, sipas tij, duhet të adresohen përmes ndryshimeve ligjore në të ardhmen.

– YouTube www.youtube.com