Lista studentore: “Nuk do t’ia dilni të pengoni dijasporën t’ju largojë nga pushteti”

Lista studentore “Studentët fitojnë” i është drejtuar sot pushtetit në Serbi me mesazhin se nuk do t’ia dalë ta pengojë dijasporën që ta largojë atë nga pushteti, siç njofton Danas.

Propozimi i Ministrisë së Punëve të Jashtme drejtuar Komisionit Republikan të Zgjedhjeve (RIK) për hapjen e vendvotimeve jashtë vendit paraqet “përpjekje të turpshme për sabotim të procesit zgjedhor, sulm të drejtpërdrejtë ndaj rendit kushtetues dhe luftë të hapur kundër qytetarëve tanë jashtë vendit”, thuhet në deklaratën e listës.

“Përderisa prej vitesh e lavdëroni publikisht dijasporën, i referoheni patriotizmit të saj dhe jetoni me paratë që ajo dërgon familjeve të saj në atdhe, sot i pështyni drejtpërdrejt në fytyrë dhe i propozoni t’i hiqet e drejta themelore e garantuar me Kushtetutë — e drejta për të votuar”, theksohet në deklaratë.

Lista studentore kujton se Ministria e Punëve të Jashtme nuk i cakton vendvotimet — sipas ligjit, vetëm RIK-u është kompetent të marrë vendimin përfundimtar. Por, siç vlerëson lista, vetë akti i dërgimit të një propozimi të tillë tregon qartë synimin e pushtetit që përmes ministrive të veta të ushtrojë presion mbi RIK-un dhe të përdorë “manipulimet më primitive juridike” që vendvotimet thjesht “të fshihen”.

Në fund, lista i kërkon pushtetit “të ndalojë së trajtuari dijasporën si bankomat, duke i mohuar të drejtën për të vendosur për fatin e vendit të vet” dhe përfundon: “Të drejtën e votës do ta mbrojmë — sepse presionet tuaja nuk na frikësojnë, por na bashkojnë.”

Debati për votën e dijasporës është ndezur para zgjedhjeve të parakohshme parlamentare të 25 tetorit, ndërsa më herët është raportuar për pengesa administrative në regjistrimin e votuesve në ambasada dhe konsullata.