LONDËR – 100 migrantë shpëtohen pas defektit të gomones në La Mansh

LONDËR, 18 gusht /ATSH-DPA/ – Rreth 100 migrantë janë shpëtuar pasi gomonia e tyre pësoi defekt në La Mansh.

Mjeti lundrues pësoi një defekt në motor pak pasi ishte nisur nga bregdeti francez dje në mëngjes.

“Në total, 96 persona u shpëtuan dhe u dërguan në portin francez të Boulogne-sur-Mer”, thanë autoritetet franceze.

“Kur gomonia u nis nga plazhi i Le Touquet, rreth 30 persona mbetën në ujë, mes tyre disa që ndodheshin në vështirësi serioze për shkak të rrymave detare”, thanë ekipet e shpëtimit.

Katër persona u nxorën nga uji me helikopter, ndërsa gjashtë të tjerë u shpëtuan nga një mjet shpëtimi detar.

Ndërkohë, migrantë nga një tjetër varkë u fotografuan nga “Association Press” duke mbërritur dje në mbrëmje në kompleksin e Komandës së Sigurisë Kufitare në Dover, Kent.

Në fillim të këtij muaji, një rekord prej 230 personash e kreu udhëtimin me një varkë të vetme.

Bandat e trafikimit duket se kanë nisur të ngarkojnë më shumë persona në një varkë të vetme gjatë javëve të fundit.

Kryeministri Andy Burnham ka premtuar se do të “ndryshojë taktikat” për të luftuar aktivitetin e këtyre bandave. /Ad.Ab./ a.jor.