Lumturimi i Martirëve, Shkodra në pritje të 10 mijë pelegrinëve

Në sheshin përpara Katedrales së “Shen Shtjefinit” në Shkodër, janë duke u bërë përgatitjet e fundit për  kremtimin e Meshës Solemne  së Lumturimit  të 38 Martirve të Kishes Katolike.

Mesha, e cila do mbahet të shtunën do kremtohet nga Eminenca e Tij, Kardinal Angelo Amato në praninë e zyrtarëve të lartë shtetërorë dhe të  Vatikanit.

Në vigjilje të Lumturimit të 38 Martirëve është përkujtuar 26-vjetori i meshës së parë pas përmbysjes së regjimit komunist në Varrezat e Rrmajit, kremtuar   nga Dom Simon Jubani.

Ndërkohë ne sheshin e Kadetrales në Shkodër kanë filluar të mbërrijnë grupe besimtarësh dhe nga jashtë kufijve.

“Jemi një grup prej 50 personash që vijmë nga provinca e Udines që jemi munduar të kontribojmë për Famullinë e Shkodrës dhe kemi ardhur për të ndjekur meshën e Lumturimit të 38 Martirve. Jemi të kënaqur është një atmosferë shumë e ngrohtë”, thotë Bianca Rossa.

Policia e Shkodrës, në një njoftim për media ka bërë të ditur se të shtunën në shesh priten të jenë rreth 10.000 përsona dhe janë  marrë një sërë masash teknike dhe organizative për sigurimin e rendit para, gjatë dhe pas zhvillimit të aktivitetit.

Kështu rruga kryesore për te Katedrialia do jetë e bllokuar për lëvizje dhe parking automjetesh si dhe rrugët dytësore që të shpien për te Katedralia do jenë të bllokuara për automjetet. Gjithashtu policia kërkon mirëkuptimin e njësive tregtare në zonën ku do zhvillohet aktiviteti që të mbyllin  dyqanet  nga ora 06.00 deri në  përfundimin e aktivitetit.