MALI I ZI ËSHTË GATI PËR MBYLLJEN E KAPITULLIT 19

_{Foto: BE}

Mali i Zi është i gatshëm për mbylljen e Kapitullit 19 – Politika sociale dhe punësimi, njoftoi Ministria e Punës, Punësimit dhe Dialogut Social.

Sipas ministrisë, gjatë vitit 2026 janë forcuar të drejtat e punonjësve, mbrojtja nga diskriminimi dhe mekanizmat e inspektimit, ndërsa ndryshimet në Ligjin e Punës kanë përmirësuar transparencën e pagave, barazinë në pagesë mes grave dhe burrave, të drejtat e prindërve dhe kujdestarëve, si dhe rregullimin e punës nga distanca.

Gjatë vitit është miratuar edhe Ligji i ri për Mbrojtjen dhe Shëndetin në Punë, ndërsa nga janari 2025 deri në fund të qershorit 2026 janë kryer 8.683 kontrolle inspektuese.

Ministria thekson se janë zgjeruar edhe politikat aktive të punësimit, me 17 programe për 2.062 pjesëmarrës dhe një rritje prej 75 për qind të buxhetit për këto masa.

Vëmendje e veçantë i është kushtuar të rinjve përmes Garancisë për të Rinjtë, ndërsa përmes programit operativ për punësim dhe përfshirje sociale 2024–2027 janë në dispozicion 31.6 milionë euro.

Nga ministria thonë se synimi nuk është vetëm mbyllja e kapitullit, por që standardet evropiane të punës të përkthehen në kushte më të sigurta, paga më të drejta dhe mbrojtje më të madhe të të drejtave të punonjësve.