LIDERËT EVROPIANË TË DREJTËSISË: REFORMAT KUSHTETUESE NË MAL TË ZI NUK DUHET TË CENOJNË PAVARËSINË E INSTITUCIONEVE

_{Foto: Gjykata Kushtetuese / Ustavni sud}

Reformat kushtetuese që e presin Malin e Zi në rrugën drejt Bashkimit Evropian duhet të ruajnë pavarësinë e institucioneve, ndarjen e pushteteve dhe sigurinë e mandatit të gjyqtarëve, u vlerësua në konferencën ndërkombëtare “Për Kushtetutën, shtetin dhe demokracinë”, e mbajtur në Tivat.

Në konferencë, ku morën pjesë përfaqësues të gjykatave kushtetuese dhe më të larta evropiane, si dhe të Gjykatës Evropiane për të Drejtat e Njeriut, Gjykatës së Drejtësisë së BE-së dhe Komisionit të Venecias, u theksua se procesi i integrimit evropian kërkon përshtatje të sistemit kushtetues, por reformat nuk duhet të përdoren për të dobësuar mekanizmat që garantojnë pavarësinë institucionale dhe gjyqësore.

Pjesëmarrësit theksuan se Mali i Zi duhet t’i zgjidhë çështjet kryesore kushtetuese para anëtarësimit në BE, përfshirë bazën kushtetuese për transferimin e ushtrimit të kompetencave të caktuara sovrane te Bashkimi Evropian.

Sipas tyre, anëtarësimi nuk nënkupton vetëm ndryshime në tekstin e Kushtetutës, por edhe përshtatje të rolit të Kuvendit, Qeverisë, gjykatave të rregullta dhe Gjykatës Kushtetuese në zbatimin e së drejtës së BE-së dhe bashkëpunimin me institucionet gjyqësore evropiane.

Gjithashtu, u theksua se mbrojtja e pavarësisë së gjyqësorit nënkupton sigurinë e mandatit dhe integritetin profesional të gjyqtarëve, ndërsa pas anëtarësimit gjykatat kushtetuese kombëtare do të vazhdojnë të kenë rol të rëndësishëm në mbrojtjen e rendit kushtetues dhe shtetit të së drejtës.