Mali i Zi: Hiqen kontributet për pensionet, rritet tatimi mbi fitimin dhe paga minimale arrin 1.000 euro

Qeveria e Malit të Zi miratoi mbrëmë një paketë propozim-ligjesh fiskale, në të cilat revista “Vijesti” pati qasje. Paketa sjell ndryshime rrënjësore në sistemin e tatimeve dhe kontributeve, që pritet të hyjnë në fuqi nga janari.

Ndryshimi më i rëndësishëm është shfuqizimi i kontributeve për sigurimin pensional dhe invalidor (PIO). Kontributet, që sot përbëjnë 10 për qind të pagës bruto, do të bien në zero — dhe kjo shumë do t’i shtohet drejtpërdrejt pagës neto që marrin punonjësit.

Nga ana tjetër, qeveria heq shkallën e mesme të tatimit mbi fitimin prej 12 për qind, e cila aplikohej për shumat nga 100.000 deri në 1,5 milionë euro. Tani këto shuma do të tatimohen me shkallën më të lartë, prej 15 për qind.

Paketa ul gjithashtu përqindjet që u ridrejtoheshin komunave nga tatimi mbi të ardhurat personale, tatimi mbi pasurinë e paluajtshme, taksa për automjetet motorike dhe tarifat nga lojërat e fatit. Kështu, më shumë para do të mbeten në buxhetin e shtetit.

Përfitime parashikohen edhe për pagat e pensionet. Paga minimale rritet në 1.000 euro për punët që kërkojnë arsim nën të mesmin, në 1.250 euro për ata me shkollë të mesme (shkallët III dhe IV) dhe në 1.400 euro për punonjësit me arsim të lartë (shkalla VI e lart). Pensionet ndërkohë do të indeksohen katër herë në vit, duke ndjekur rritjen e pagave dhe të çmimeve të konsumit.

Në arsyetimin e saj, qeveria pranon se shfuqizimi i kontributeve PIO do të krijojë një deficit të ndjeshëm buxhetor, por pret ta kompensojë përmes rritjes së tatimit mbi fitimin dhe mbajtjes së më shumë të ardhurave në arkën shtetërore. Rritja e pagave do të rrisë edhe pensionet përmes formulës së indeksimit, ndërsa pagat dhe pensionet më të larta do të nxisin konsumin — duke sjellë më shumë TVSH dhe akciza në arkë, që sipas qeverisë do ta kompensojnë plotësisht humbjen.

Burimi: Vijesti