Mali i Zi i ekstradon SHBA-së Amir Baratin: akuzohet për sulme kibernetike me dëme mbi 3,4 miliardë dollarë

Mali i Zi i ka ekstraduar Shteteve të Bashkuara Amir Baratin (40), shtetas të Turqisë dhe Iranit, të cilin autoritetet amerikane e akuzojnë për sulme masive kibernetike kundër më shumë se 150 universiteteve, me dëme që sipas hetimeve kalojnë 3,4 miliardë dollarë, njoftoi Drejtoria e Policisë së Malit të Zi, siç raporton portali CdM.

Sipas policisë malazeze, Barati u lokalizua dhe u arrestua më 25 qershor 2026 në territorin e komunës së Kotorrit, pas një kërkese të drejtpërdrejtë për arrest të lëshuar nga organet kompetente të Shteteve të Bashkuara dhe Byroja Federale e Hetimeve (FBI).

“Deri në momentin e heqjes së lirisë, A.B. konsiderohej cak i profilit të lartë të kërkimit në fushën e krimit kibernetik dhe krimit të organizuar. Urdhri i arrestimit është lëshuar për të siguruar praninë e tij në procesin penal që zhvillohet kundër tij në Shtetet e Bashkuara, përpara Gjykatës së Lartë në Nju Jork, për disa akuza”, thuhet në njoftimin e policisë.

Ai akuzohet se ka kryer veprat penale: komplot për kryerjen e mashtrimit kompjuterik dhe hakerimit të kompjuterave, si dhe vjedhje identiteti — në atë mënyrë që që nga viti 2013, si bashkëpunëtor i një personi juridik nga territori i Iranit, kreu sulme masive hakersh kundër infrastrukturës së SHBA-së, duke shkaktuar, sipas vlerësimeve, dëme mbi 3,4 miliardë dollarë amerikanë.

Sipas hetimit, të dhënat e vjedhura, si dhe qasja në llogaritë e komprometuara universitare, janë përdorur në dobi të Gardës Revolucionare Iraniane (IRGC) dhe përdoruesve të tjerë iranianë, përfshirë universitete me seli në Iran.

Shkëmbimi i informacionit operativ dhe i të dhënave të inteligjencës që çuan në heqjen e lirisë dhe, përfundimisht, në ekstradimin e A.B.-së në SHBA, paraqet vazhdimin e bashkëpunimit të bazuar në profesionalizëm dhe standarde më të larta policore në bashkëpunimin operativ ndërkombëtar të organeve të zbatimit të ligjit mes Malit të Zi dhe SHBA-së, thuhet në njoftim.

“Aksioni i lokalizimit dhe heqjes së lirisë së këtij caku të profilit të lartë, i realizuar me sukses nga NCB Interpol Podgorica, vazhdoi bashkëpunimin e shkëlqyer mes NCB Interpol Podgorica dhe Byrosë Federale të Hetimeve (FBI), i cili në tre vitet e fundit ka rezultuar me lokalizimin dhe arrestimin e gjithsej shtatë personave në Mal të Zi, të kërkuar nga FBI-ja dhe organet gjyqësore të SHBA-së”, përfundon njoftimi i policisë malazeze, cituar nga CdM.