Marrëveshja e huasë me SHBA-në, Nufi: Lidhet me marrjen e disa mjeteve që u duhen Forcave të Armatosura

Ministri i Mbrojtjes, Ermal Nufi, pas mbledhjes së qeverisë këtë të enjte, bëri me dije se është miratuar vendimi për shpërblimin e zjarrfikësve dhe pjesëtarëve të Forcave të Armatosura që janë angazhuar në operacionet masive për fikjen e zjarreve në vend.

Ai deklaroi se mbi 1,380 forca tokësore, së bashku me mjetet zjarrfikëse dhe flotën e helikopterëve, kanë bërë të mundur shuarjen e 27 vatrave të zjarrit në të gjithë territorin, ndërsa po vijon ndërhyrja nga ajri dhe toka për neutralizimin e vatrës aktive në zonën e Dajtit.

Më tej, ai u ndal edhe te marrëveshja me SHBA-në, e cila sipas tij lidhet me marrjen e disa mjeteve që i duhen Forcave të Armatosura, duke theksuar se ky investim lidhet me zbatimin e standardeve dhe angazhimeve të marra në kuadër të Aleancës.

“Sot është miratuar vendimi i cili autorizon që të jepen shpërblime për zjarrfikësit. Gjithashtu, janë miratuar edhe shpërblimet për të gjitha forcat e armatosura që janë angazhuar në situatën e zjarreve.

Kemi 27 vatra zjarri që janë shuar. Janë mbi 1,380 forca që janë angazhuar në shuarjen e zjarreve. Mjetet zjarrfikëse dhe flotat e helikopterëve janë angazhuar gjatë zjarreve. Kemi një situatë zjarri në Dajt, ku po bëhet e mundur shuarja edhe nga ajri.

Ky shpërblim shkon në vendin e duhur, duke garantuar që situata të jetë nën kontroll. Shpërblimi është miratuar.

Lidhur me marrëveshjen me SHBA-në, ajo është angazhuar këtë vit dhe lidhet me marrjen e disa mjeteve, pajisjeve dhe sistemeve që i duhen Forcave të Armatosura. Për samitin janë disa sisteme që duhen. A lidhen këto me kapacitetin e Forcave të Armatosura? Patjetër që po.

Një marrëveshje që për herë të parë është 302 milionë dollarë tregon jo vetëm mbështetjen politike, por edhe se shteti dhe siguria e shtetit të Shqipërisë lidhen me samitin, por jo me samitin që do të vijë në Tiranë; lidhet me Samitin e Hagës. Këto shpenzime nuk lidhen vetëm me Shqipërinë, por me të gjitha shtetet e Aleancës.

Janë të gjitha shtetet e Aleancës që kanë pasur një qasje standarde në lidhje me mbrojtjen. Nga Samiti i Hagës është vendosur që rritja e shpenzimeve të arrijë deri në vitin 2035, ajo që quhet angazhimi i Hagës: 3.5% të lidhura vetëm me mbrojtjen dhe 1.5% që janë të lidhura me mbrojtjen, si siguria kibernetike dhe infrastruktura kritike”, u shpreh Nufi.