Mbështetje marrëveshjes së partive shqiptare në Mal të Zi

Partitë shqiptare në Mal të Zi, kanë vendosur të bashkohen për zgjedhjet lokale të 26 nëntorit në Tuz, qendrën e Malësisë së Malit të Zi ku shqiptarët janë shumicë.

Marrëveshja është nënshkruar mes partive shqiptare, të cilat angazhohen se pavarësisht dallimeve ideologjike të formacioneve të tyre politike, vetëm përmes një platforme të përbashkët, do të jenë në gjendje të përfaqësojnë siç duhet interesat e shqiptarëve.

Ministria për Evropën dhe Punët e Jashtme e Republikës së Shqipërisë ka përshëndetur dhe mirëpritur këtë marrëveshje të aktorëve politike e shoqërore në Tuz, Mali i Zi, për të bashkërenduar përpjekjet në mbrojtje dhe përfaqësim të interesave të shqiptarëve në Trevën e Malësisë gjatë procesit të zgjedhjeve.

Në një deklaratë për shtyp, MEPJ mirëpret ndërgjegjësimin e faktorëve politike e shoqërorë shqiptarë në Malin e Zi për të nxjerrë mësime nga problemet, dasitë dhe dështimet e së kaluarës.

MEPJ konsideron se angazhimi publik për të bashkuar zërin dhe forcat për të shfrytëzuar maksimalisht hapësirën e rregullave të lojës demokratike për të maksimizuar rezultatin përbën rrugën e duhur dhe mënyrën më të mirë për të realizuar të drejtat që u garanton ligji dhe kuadri ligjor në Malin e Zi dhe ai ndërkombëtar, në përputhje me pritshmëritë dhe kërkesat e popullsisë shqiptare për mirëqeverisje, progres dhe begati.