Mbi 11 milionë euro për rinovimin e Kripores së Ulqinit, ndërmarrja e re e merr menaxhimin në janar 2027

Për rinovimin e Kripores së Ulqinit do të duhen më shumë se 11 milionë euro, ndërsa ndërmarrja e re “Parku i Natyrës Kriporja e Ulqinit” menaxhimin e zonës së mbrojtur pritet ta marrë në janar të vitit 2027, siç njofton Vijesti, duke iu referuar Hartës së Rrugës për Kriporen e Ulqinit, dokument i miratuar nga qeveria malazeze që përmban edhe planin e veprimit për menaxhimin e zonës për periudhën 2026–2030.

Sipas raportimit të Vijesti, vetëm për sanimin e katër stacioneve prioritare të pompimit janë planifikuar 2,1 milionë euro, për rinovimin e 53 kilometrave argjinatura prioritare dhe 17 kilometrave argjinatura rrethuese 5,3 milionë euro, ndërsa për kanalet e brendshme dhe kanalin furnizues nevojiten edhe 3,93 milionë euro të tjera. Për punësimin e 33 punëtorëve në ndërmarrjen e re janë parashikuar 2,5 milionë euro në një periudhë pesëvjeçare.

Ndërmarrja e re është themeluar nga qeveria e Malit të Zi me 60 për qind dhe Komuna e Ulqinit me 40 për qind të aksioneve. Seanca konstituive e saj u mbajt më 14 tetor, kur kryetar i kuvendit të shoqërisë u zgjodh unanimisht Aleksandar Popoviq, ndërsa për 23 tetor është caktuar seanca ku do të emërohen bordi i drejtorëve dhe drejtori ekzekutiv. Derisa ndërmarrja e re të arrijë kapacitetin e plotë operativ, kontrata e qirasë së pasurisë së Kripores me Ndërmarrjen Publike për Parqet Kombëtare do të zgjatet deri në fund të dhjetorit 2026.

Vendosja e një menaxhimi funksional të Kripores së Ulqinit është një nga detyrimet e Malit të Zi në procesin e anëtarësimit në Bashkimin Evropian, në kuadër të kriterit përmbyllës për Kapitullin 27, që ka të bëjë me mjedisin dhe ndryshimet klimatike. Zona u shpall Park Natyror në vitin 2019 dhe po atë vit u përfshi edhe në Listën Ramsar të ligatinave me rëndësi ndërkombëtare, ndërsa punimet e rinovimit do të kufizohen kryesisht në periudhën nga gushti deri në mes të tetorit, për shkak të sezonit të folezimit të shpendëve.

Kriporja, pellgjet e para të së cilës u ndërtuan midis viteve 1926 dhe 1934, korrjen e fundit të kripës e pati në vitin 2013, pas së cilës fabrika u mbyll dhe punëtorët u larguan masivisht. Siç kujton Vijesti, administrata e falimentimit u detyrohet ende ish-punëtorëve rreth 900 mijë euro paga dhe kontribute të papaguara nga vitet 2009 dhe 2010.