Milatović pas bisedës me Kallas: Lavdërimi i kriminelëve të luftës nuk është pjesë e vlerave evropiane; objektivi — Mali i Zi anëtari i 28-të i BE-së në 2028

Presidenti i Malit të Zi, Jakov Milatović, bëri të ditur mbrëmjen e sotme se ka biseduar me Përfaqësuesen e Lartë të Bashkimit Evropian për Punët e Jashtme dhe Politikën e Sigurisë, Kaja Kallas.

Në një postim në rrjetin X, Milatović theksoi se lavdërimi i kriminelëve të luftës nuk është dhe nuk mund të jetë pjesë e vlerave evropiane. Sipas tij, glorifikimi i krimeve të luftës është i papajtueshëm me kursin evropian që ndjek vendi.

Presidenti malazez deklaroi se objektivi strategjik mbetet i qartë: axhenda reformuese duhet të mbetet në fokus, në mënyrë që Mali i Zi të bëhet anëtari i 28-të i Bashkimit Evropian deri në vitin 2028.

Sipas Milatovićit, gjatë bisedës është folur edhe për detyrimin për të respektuar vendimet e gjykatave ndërkombëtare penale, si dhe për marrëdhëniet mes BE-së dhe Kinës — çështje kjo veçanërisht në kontekstin e vizitës së ardhshme të ministrit kinez të Punëve të Jashtme në Mal të Zi.

Milatović theksoi se vendi do të vazhdojë një politikë të jashtme të përgjegjshme dhe parimore, plotësisht në përputhje me angazhimin për anëtarësimin në Bashkimin Evropian.

Burimi: Vijesti