Mjekët shqiptarë kontestojnë zgjedhjen e drejtuesve të Odës së Mjekëve, paralajmërojnë padi në Gjykatën Administrative

Shoqata e Mjekëve Shqiptarë në Maqedoni (SHMSHM) ka reaguar ashpër ndaj zgjedhjes së organeve të reja drejtuese të Odës së Mjekëve të Maqedonisë së Veriut, duke akuzuar për shkelje të dispozitave statutare dhe mosrespektim të përfaqësimit të mjekëve shqiptarë, siç njofton Mediatiku, duke iu referuar Zhurnalit.

Reagimi vjen pas mbledhjes së sotme të Kuvendit të Odës së Mjekëve, ku prof. dr. Nikola Jankullovski u zgjodh kryetar i ri, ndërsa dr. Idriz Orana u zgjodh zëvendëskryetar. Sipas SHMSHM-së, zëvendëskryetari i sapozgjedhur dhe anëtari i Këshillit Drejtues nuk e përfaqësojnë shoqatën dhe nuk kanë mandat për mjekët shqiptarë.

Shoqata paralajmëroi se do të ndërmarrë hapa ligjorë, përfshirë procedura pranë Gjykatës Administrative, për ta kontestuar zgjedhjen.

Oda e Mjekëve është organizata profesionale që përfaqëson të gjithë mjekët në vend. Në kryesinë e re u zgjodhën edhe dr. Biljana Petkovska Ognjanova për kujdesin parësor, dr. Lençe Neloska për atë dytësor dhe dr. Risto Todorov për atë tretësor.