MOSKË – IEA ul sërish parashikimet për prodhimin rus të naftës

– Agjencia Ndërkombëtare e Energjisë (IEA) ka ulur sërish parashikimet për prodhimin e naftës së Rusisë, duke fajësuar ndikimin e sulmeve të vazhdueshme me dronë ukrainas ndaj infrastrukturës energjetike ruse, sipas Reuters.

Rusia, prodhuesi i tretë më i madh i naftës në botë, po përballet me rënie të prodhimit ndërsa sulmet ukrainase kanë goditur objekte të rëndësishme energjetike, përfshirë rafineritë e naftës.

Në raportin e saj mujor, IEA uli me 125 mijë fuçi në ditë parashikimin për prodhimin rus në vitin 2026, në 8,7 milionë fuçi në ditë.

Për vitin 2027, parashikimi u shkurtua me 235 mijë fuçi në ditë, në një mesatare prej 8,6 milionë fuçi në ditë.

Sipas të dhënave të IEA-së, prodhimi rus i naftës së papërpunuar ra në gusht me 200 mijë fuçi në ditë krahasuar me korrikun, duke zbritur në 8,36 milionë fuçi në ditë.

Ky nivel është rreth 940 mijë fuçi në ditë më i ulët se kulmi i janarit 2026, kur Rusia prodhonte 9,3 milionë fuçi në ditë.

Krahasuar me një vit më parë, prodhimi është ulur me rreth 695 mijë fuçi në ditë.

Edhe qeveria ruse ka rishikuar më poshtë perspektivën e prodhimit të naftës për këtë vit, në nivelin më të ulët të parashikuar në 17 vjet, ndërsa ka ulur gjithashtu pritshmëritë për eksportet e karburanteve në 2026 dhe 2027.

Rusia nuk publikon më të dhëna zyrtare për prodhimin e naftës që nga prilli 2023.

Ndërkohë, OPEC vlerësoi se prodhimi rus ra me 160 mijë fuçi në ditë në gusht, në 8.718 milionë fuçi në ditë.

Divergjenca mes vlerësimeve të IEA-së dhe OPEC-ut lidhet me metodologji dhe burime të ndryshme të të dhënave.