Moti i keq, bora bllokon qarkullimin në Llogara

Pavarësisht se ndodhemi në muajin prill, situata e motit në disa zona të vendit mbetet problematike. Reshjet e dëborës kanë bllokuar qarkullimin e automjeteve në Qafën e Llogarasë. Sipas raportive, erërat e forta dhe ngricat kanë paralizuar lëvizjen e mjeteve në këtë aks.

Policia ka ngritur një postbllok në hyrje të Llogarasë, duke mos lejuar qarkullimin e asnjë automjeti pa u pajisur më parë me zinxhirë.

Problematike mbeten edhe zona të ndryshme në Peshkopi. Reshjet e dëborës dhe shiut kanë shkaktuar bllokim të disa fshatrave.

Në hyrje të qytetit, rrugët janë përmbytur për shkak të mosfunksionimit të kanalizimeve, ndërsa në të gjithë qarkun e Dibrës vijojnë reshjet e dëborës.

Ndërsa në veri, të bllokuar janë fshatrat e Dukagjinit dhe disa fshatra të thellë të Pukës. Në Kukës po punohet për pastrimin e disa segmenteve në Rrugën e Kombit, nga shembja e masiveve shkëmbore.

Durrësi, probleme nga reshjet e shiut

Disa lagje të Durrësit janë përmbytur duke izoluar dhjetëra familje. Në disa zona të qytetit, niveli i ujit arriti deri mbi 1 metër, ndërsa thuajse të gjitha rrugët e Durrësit u bënë të pakalueshme, duke sjellë probleme të shumta në lëvizjen e mjeteve dhe të këmbësorëve.

Situata më problematike paraqitet në zonat Shkozet, ish-­Kënetë, Spitallë dhe Plazh, ku dhjetëra familje kanë mbetur të bllokuara, pasi niveli i ujit nuk ka zbritur ende.