“Muxhahedinët pjesë e një operacioni humanitar”/ Shqipëria e koordinuar ngushtësisht me SHBA

08 January 2020, 22:04 · 3 min lexim

Kryeministri Edi Rama thekson nga Vjena se nuk është surprizuar nga deklarata e liderit suprem të Iranit, Ali Khamenei, i cili e quajti Shqipërinë “një vend të vogël dhe të keq”, për shkak të strehimit të mbi 3000 anëtarëve të opozitës iraniane MEK.

Në një intervistë për televizionin Top Channel, Rama tha se “në vigjilje të një momenti historik, pasi Shqipëria merr për herë të parë në historinë e saj një rol të rëndësishëm në skenën ndërkombëtare për kryesimin e OSBE-së, nuk jam fare i surprizuar nga deklarata në fjalë”.

“Shqipëria ka bërë atë që duhet në respekt të traditës së saj, në respekt të faktit që jemi aleatë strategjikë të SHBA dhe nuk jemi kontributorë në këtë aleancë të madhe me raketa apo bomba, por jemi kontributorë në ofrimin përmes një operacioni humanitar, të strehës për një grup njerëzish të kërcënuar me vdekje nga një regjim diktatorial”, tha Rama.

“Sa i përket aspektit të sigurisë, kemi qenë dhe jemi ngushtësisht të koordinuar me SHBA, që do të thotë që gjithnjë ka një shqetësim kur bëhet fjalë për t’u gjendur në situata kur shqetësohet një diktaturë, sidomos një diktaturë si ajo e Iranit, por nga ana tjetër ne ka momente jo vetëm kur duhet të marrim, por edhe të japim. U them të gjithë shqiptarëve që nuk duhet të ketë asnjë shqetësim, dhe SHBA-të janë shumë vëmendshme dhe të angazhuara në sigurinë e vendit tonë”, – u përgjigj Rama.

I pyetur se çfarë do të përfitojë Shqipëria nga drejtimi i OSBE-së, Kryeministri Rama theksoi se “Shqipëria ka marrë nga OSBE për shumë vite, dhe sot është momenti kur Shqipëria është në pozitën që të japë. Në radhë të parë, ky është një prestigj shumë i madh për Shqipërinë. Në radhë të dytë, sigurisht për ne do të jetë një eksperiencë e jashtëzakonshme. Ne e ndiejmë përgjegjësinë shumë të madhe, por është dhe një mundësi e jashtëzakonshme për të manifestuar ndërkombëtarisht tiparet dhe kapacitetet e një Shqipërie që paskëtaj, të jeni të sigurt që do të shihet edhe me më shumë respekt nga ata që e njohin, dhe me më shumë respekt nga ata që deri më sot nuk e njohin”.

Në përgjigje të pyetjes, nëse Shqipëria i ka kapacitetet për të drejtuar një organizatë ku aderojnë 57 vende, Rama u shprehe se “sot kemi qenë në Vjenë, në zyrat e posaçme të këtij misioni të jashtëzakonshëm që kemi marrë përsipër. Aty ka një skuadër me ekspertë shqiptarë dhe ndërkombëtarë, që janë një garanci absolute për suksesin e misionit”.

“Nesër është marrja zyrtare e drejtimit të OSBE-së dhe do t’i drejtohem të gjithë përfaqësisë së gjerë që do të jenë prezent përmes ambasadorëve të tyre, duke iu komunikuar sfidat dhe prioritetet”, – deklaroi Rama.

“Muxhahedinët pjesë e një operacioni humanitar”/ Shqipëria e koordinuar ngushtësisht me SHBA

Komentet

Lini një Koment të Ri

“Muxhahedinët pjesë e një operacioni humanitar”/ Shqipëria e koordinuar ngushtësisht me SHBA

Komentet

Lini një Koment të Ri

Lexo Gjithashtu

“Revolucioni i Flamingove” përplas Ramën me Iranin

Nismë për reformë zgjedhore/ Kristaq Kume dorëzon në KQZ kërkesën për mbledhjen e 20 mijë firmave në mbështetje të ndryshimeve në Kodin Zgjedhor

“Bashkohuni më 10 qershor”/ Mbyllet pas afro 6 orësh protesta madhështore në Tiranë, qytetarët paralajmërojnë vijimin e mobilizimit