Ndalohen dy persona në Lezhë për abuzim seksual me një 15-vjeçare, 46-vjeçarja dyshohet se ndërmjetësoi takimin
E. K., 32 vjeç, dyshohet se kreu marrëdhënie seksuale me dhunë me të miturën, e cila dyshohet se vuan nga probleme të shëndetit mendor; A. Gj., 46 vjeçe, u ndalua për trafikim të të miturve dhe moskallëzim të krimit
Dy persona janë ndaluar në Lezhë në lidhje me një rast abuzimi seksual me një shtetase të mitur, siç njofton Policia e Shtetit në reagimin e Drejtorisë Vendore të Policisë Lezhë për rastin e transmetuar më 17 nëntor 2026 në emisionin investigativ “Stop”.
Sipas Policisë, shërbimet e saj, menjëherë pas transmetimit të rastit, kryen verifikimet dhe veprimet e nevojshme hetimore e procedurale për dokumentimin ligjor të rastit dhe vënien e autorëve përpara përgjegjësisë penale. Policia komunikoi edhe me familjarët e së miturës, njëri prej të cilëve, shtetasi A. K., u paraqit dje në Komisariatin e Policisë Lezhë dhe bëri kallëzim për rastin.
Në përfundim të veprimeve të kryera nga specialistët për Hetimin e Trafiqeve të DVP Lezhë, në bashkëpunim me specialistët për Hetimin e Krimeve të Komisariatit të Policisë Lezhë, në drejtimin e Prokurorisë së Lezhës, u ndalua shtetasi E. K., 32 vjeç, për veprën penale “Marrëdhënie seksuale ose homoseksuale me dhunë me të mitur të moshës 14-18 vjeç”, dhe shtetasja A. Gj., 46 vjeçe, për veprat penale “Trafikimi i të miturve” dhe “Moskallëzimi i krimit”.
Shtetasi E. K. dyshohet se ka kryer marrëdhënie seksuale me dhunë me shtetasen e mitur 15 vjeçe, e cila dyshohet se vuan nga probleme të shëndetit mendor, ndërsa shtetasja A. Gj. dyshohet se ka ndërmjetësuar takimin e të miturës me shtetasin E. K.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme. DVP Lezhë falënderon stafin e emisionit “Stop” për bashkëpunimin dhe garanton se çdo indicie apo denoncim për cenimin e të drejtave dhe sigurisë së të miturve trajtohet me seriozitet maksimal.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.