Nis restaurimi i qendrës historike të Vlorës, firmoset marrëveshja, 11 milionë euro
Në Vlorë u nënshkrua të dielën marrëveshja e mirëkuptimit për projektin e rilindjes së qendrës historike të qytetit mes qeverisë shqiptare dhe Fondit Shqiptaro-Amerikan të Zhvillimit.
I pranishëm në ceremoninë e nënshkrimit të marrëveshjes me vlerë rreth 11 milionë euro ishte edhe Kryeministri Edi Rama dhe kreu i Fondit, Michael Granoff.
Sipas tij, qyteti ka arritur të trashëgojë disa gjurmë të vjetërsisë dhe ka potencial për një tjetër impuls të rëndësishëm në funksion të turizmit dhe atij transformimi që ne kemi nisur e do ta vazhdojmë duke e kthyer Vlorën në një pikë referimi për Shqipërinë që duam”.
Referuar marrëveshjes, Fondi Shqiptaro-Amerikan i Zhvillimit do të investojë në këtë projekt 4 milionë euro, ndërsa qeveria shqiptare 7 milionë euro.
“Përmes këtij investimi do t’i japim kësaj zone të Vlorës një pamje e përmbajtje të re dhe besoj që do tu krijojmë, jo vetëm banorëve të zonës, por gjithë komunitetit një tjetër burim zhvillimi eknomik e mirëqenie sociale, përveçse edhe një tjetër arsye për të qenë krenar për Vlorën”, deklaroi Rama.
Duke u ndalur në detaje të projektit të rilindjes së qendrës historike të qytetit, Kryeministri Rama tha se përpjekja për të ruajtur gjithçka ka mbetur nga e shkuara do të materializohet me restaurimin e shtëpisë së Marigosë, shtëpia ku u qëndis flamuri, shtëpisë së qeverisë, e cila do të ngrihet duke ruajtur arkitekturën ekzistuese, por edhe Xhamisë së Muradies, etj.
Kreu i Fondit, Michael Granoff tha se, “kjo është zona e tetë e zhvillimit të biznesit dhe turizmit që Fondi ka financuar. “Janë në total 18 milionë dollarë në Krujë, Shkodër, Berat, Gjirokastër, Korçë dhe Tiranë”, tha ai.